Nyu-York, Dallas va Tokio oʻrtasida qanday oʻxshashlik bor? Ularning barchasida juda boy odamlar yashaydi. Bu haqda Business Report nashri, boylik tahlili bilan shugʻullanuvchi Altrata kompaniyasining hisobotiga asoslanib xabar berdi.

Hisobotda qayd etilishicha, boyligi 30 million dollardan ortiq boʻlgan insonlar, yaʼni ultra-boylar dunyoning ayrim yirik shaharlari atrofida toʻplangan. Ularning qariyb 19 foizi atigi 10 ta shaharda istiqomat qiladi.

Roʻyxatning yuqori pogʻonasida Nyu-York joylashgan. Bu shahar dunyodagi eng koʻp ultra-boylar yashaydigan maskan boʻlib, bu yerda 21 380 nafar shunday inson bor. Ikkinchi oʻrinda Gonkong (17 215 nafar), uchinchi oʻrinda esa Los-Anjeles turadi.

Keyingi oʻrinlarda San-Fransisko, Chikago, Tokio, London, Dallas, Vashington (DC) va Xyuston qayd etilgan.

№	Shahar	Ultra-boylar soni	Oxirgi 12 oyga nisbatan oʻsish %i
1	Nyu-York	21,380	23,4%
2	Gonkong	17,215	11,5%
3	Los-Anjeles	11,680	24%
4	San-Fransisko	8,270	24,9%
5	Chikago	7,530	21,7%
6	Tokio	6,940	8,4%
7	London	6,660	9,7%
8	Dallas	6,530	23%
9	Vashington (DC)	6,460	23,6%
10	Xyuston	5,900	22,0%

AQSh bu borada mutlaq yetakchilikni saqlab qolmoqda. Dunyo ultra-boylarining 38 foizi aynan shu mamlakatda yashaydi. Altrata maʼlumotlariga koʻra, 2025 yil iyun oyining oxiriga kelib, dunyo boʻyicha 510 810 nafar ultra-boy mavjud boʻlgan. Bu koʻrsatkich 2004 yildan beri keskin oshib, kattalar sonining oʻsish surʼatidan yetti baravar tezroq oʻsgan.

Shunga qaramay, boshqa mintaqalarda boylar soni yanada tez ortmoqda. Hisobotda taʼkidlanishicha, AQShning birorta shahri ultra-boylar soni eng tez oʻsayotgan 10 ta shahar roʻyxatiga kira olmagan. Eng yuqori oʻsish surʼatlari Oslo (Norvegiya), Bengaluru (Hindiston) va Haydarobod (Hindiston)da kuzatilgan.

Altrata hisobotida, shuningdek, eng boy insonlar pullarini qanday sarflashlari haqida ham soʻz yuritilgan. Ularning oʻtgan yildagi hashamatli tovarlarga sarflagan xarajatlari 290 milliard dollarni tashkil etgan boʻlib, bu mablagʻning katta qismi transport vositalariga — hashamatli avtomobillar, xususiy samolyotlar va yaxtalarga — sarflangan.

Soʻnggi yillarda hashamatli brendlar tobora koʻproq ultra-boy mijozlarga eʼtibor qaratmoqda. Eng boylar uchun xizmat koʻrsatuvchi kompaniyalar keng ommaga moʻljallangan brendlarga qaraganda ancha yuqori daromad koʻrmoqda. Shu sababli, hashamatli tovarlar bozori bugungi kunda global iqtisodiyotning eng barqaror va faol yoʻnalishlaridan biri hisoblanadi.

Dunyoning eng boy odamlari yashovchi TOP-10 shahar

Toshkentda 4 kishilik oila uchun ijarasiz yashash xarajatlari 23 million soʻmga tushadi