Oʻzbekistonning yetakchi supermarket tarmoqlaridan biri Korzinka $110 million miqdorida sarmoya jalb qilganini eʼlon qildi.

Ushbu investitsiya Abu Dhabi Uzbek Investment (ADUI) va Oʻzbekiston – Oʻmon Investitsiya Kompaniyasi (UzOman) kabi yirik investorlar tomonidan yoʻnaltiriladi.

Yangi sarmoya Korzinkaning koʻp kanalli chakana savdo modelini rivojlantirish va doʻkon tarmogʻini kengaytirishga xizmat qiladi. Xususan:

Supermarket tarmogʻini mustahkamlash va kengaytirish;
Korzinka Mahalla – uy yaqinidagi kichik formatli doʻkonlar sonini oshirish;
Korzinka Go – bozorda yetakchi boʻlgan elektron tijorat platformasini rivojlantirish.

Shuningdek, kompaniya zamonaviy infratuzilmaga sarmoya kiritmoqda. Jumladan, 2025 yilning ikkinchi yarmida ishga tushirilishi rejalashtirilgan 49 000 m² maydonga ega yangi taqsimot markazi bunyod etilmoqda.

Korzinka asoschisi va Kuzatuv kengashi raisi Zafar Hoshimov ushbu kelishuv haqida shunday dedi:

“Yangi aksiyadorlarimizni mamnuniyat bilan kutib olamiz. Ushbu yirik sarmoya Korzinkaning ulkan oʻsish rejalari amalga oshishiga xizmat qiladi. Biz biznesimizni kengaytirishda davom etamiz va Oʻzbekiston oziq-ovqat chakana savdosining kelajagini shakllantirishga oʻz hissamizni qoʻshishda davom etamiz.”

Investorlar ham Korzinkaning kelajagiga katta umid bildirishmoqda. ADUI bosh direktori Sarvar Hamidov ushbu sarmoyani “Oʻzbekistondagi iqtisodiy oʻsishni ragʻbatlantiruvchi investitsiyalarning bir qismi” deb baholadi.

UzOman bosh direktori Omar Bahram esa Korzinkani “Oʻzbekiston chakana savdo sanoatini yangi bosqichga olib chiqadigan kompaniya” sifatida taʼkidladi.

YeTTB vakili Tamas Nadj esa 2020 yildagi investitsiyadan soʻng Korzinka “barqaror oʻsish va korporativ boshqaruv standartlarining joriy etilishi bilan ajralib turgan kompaniya” ekanini qayd etdi.

Korzinka hozirda Oʻzbekiston boʻylab 150 dan ortiq doʻkonga ega boʻlib, yangi investitsiya kompaniyaga doʻkonlar sonini 1000 tagacha oshirish, elektron savdo platformasini rivojlantirish va logistika infratuzilmasini modernizatsiya qilish imkonini beradi.

️Korzinka 3 ta tashkilotdan $110 millionlik sarmoya jalb qilmoqda