Mashhur amerikalik investor, Rogers Holdings egasi Jim Rojers RBC’ga bergan yangi yil oldi intervyusida muhim investitsion qarorini maʼlum qildi. Uning aytishicha, u 2025 yil oxiriga kelib AQSh va Rossiyadagi barcha aksiyalarini sotgan va oʻz portfeliga Oʻzbekiston fond bozorida savdo qilinayotgan kompaniyalar aksiyalarini qoʻshgan.

83 yoshli investor Rossiya bozoriga 2010 yillarda kirgan boʻlib, “AFK Sistema»”, “Aeroflot”, Moskva birjasi, “FosAgro” aksiyalari hamda federal qarz obligatsiyalariga egalik qilgan. Biroq 2025 yilning oktabr–noyabr oylarida u Rossiyadagi barcha aktivlarini sotganini tasdiqladi. Shu bilan birga, Rojers Rossiya bozoriga boʻlgan ishonchini yoʻqotmaganini, kelajakda yana qaytib investitsiya kiritishi mumkinligini taʼkidladi. Hozirda uning rubldagi mablagʻlari Moskva birjasida saqlanmoqda.

AQSh bozoriga keladigan boʻlsak, Rojers u yerdagi aksiyalarni sotishiga asosiy sabab sifatida uzoq davom etgan oʻsish siklining yakunlanishiga yaqinlashayotganini koʻrsatdi. Uning fikricha, sunʼiy intellekt atrofidagi shov-shuv fonida bozorda pufak shakllanishi ehtimoli kuchaygan. Jim Rojers hozircha AQSh bozorida narxlar tushishiga pul tikmayapti, yaʼni aksiyalarni shortlamayapti. Investor shunchaki Amerika aksiyalarini sotib, bozorga qaytish uchun qulayroq vaqtni kutish maqsadida mablagʻlarini asosan naqd dollarda saqlamoqda.

Oʻzbekiston bozoriga kirish

Eng eʼtiborli jihatlardan biri Rojersning Oʻzbekiston fond bozoriga kirishi boʻldi. Uning soʻzlariga koʻra, u Toshkent fond birjasida savdo qilinadigan aksiyalarning aksariyatini sotib olgan. Investor portfelida faqat oʻzbek kompaniyalari aksiyalari mavjud boʻlib, mamlakatning suveren obligatsiyalarini sotib olmagan. Shuningdek, u oʻzbek soʻmiga ishonishini va valyuta riskini xedjlamaganini (sugʻurta) ham alohida taʼkidladi.

Maʼlumot uchun, 2025 yilda Oʻzbek soʻmi AQSh dollariga nisbatan 6,8 foizga mustahkamlandi.

Jim Rojers uzoq yillardan buyon Osiyo bozorlarini istiqbolli deb hisoblab keladi. U 2007 yilda oilasi bilan Singapurga koʻchib oʻtgan va kelajak iqtisodiy oʻsish markazi Osiyo boʻlishini bir necha bor taʼkidlagan. Oʻzbekiston fond bozoriga kiritilgan investitsiya ham ushbu qarashlarning mantiqiy davomi sifatida baholanmoqda.

Amerikalik investor AQSh va Rossiyadagi aktivlarini sotib, Oʻzbekiston fond bozoriga investitsiya kiritdi