Zomindagi Ramada Encore by Wyndham mehmonxonasi 324,5 mlrd soʻmga sotildi
Auksionda yagona ishtirokchi boʻlgan Ref Bridge Invest MChJ gʻolib boʻldi. Kompaniya joriy yil 2 aprel kuni tashkil etilgan boʻlib, ustav kapitali 25 mlrd soʻmni tashkil qiladi. Jamiyat 100 foiz ulushi Feruza Boboyevaga tegishli boʻlib, unga tegishli boshqa kompaniya avvalroq Zomindagi osma-koʻprikni sotib olgan edi.
6 aprel kuni E-aukison platformasida Jizzax viloyati Zomin tumanidagi Ramada Encore by Wyndham mehmonxona majmuasi sotildi.
Auksionda yagona xaridor Ref Bridge Invest MChJ boʻlgan. U 324,55 mlrd soʻm taklif qilib gʻolib boʻlgan.
Qayd etilishicha, kompaniya ushbu summani allaqachon toʻlab boʻlgan.
Yagona davlat reyestriga koʻra, Ref Bridge Invest MChJ kompaniyasi joriy yil 2 aprel kuni tashkil etilgan boʻlib, mehmonxona faoliyati bilan shugʻullanadi. Kompaniya ustav kapitali 25 mlrd soʻm boʻlib, uning yuz foiziga Boboyeva Feruza Fayziyevna egalik qiladi.
Shuningdek, u Ref Ropeway Invest MChJ kompaniyasining ham yagona taʼsischisi hisoblanadi. Ushbu kompaniya yanvar oyida NBU Invest Groupʼdan Zomindagi kanat yoʻli operator kompaniyasini 215 mlrd soʻmga sotib olgan.
Majmua Jizzax viloyati, Zomin tumani, Duoba QFY, Archali qishlogʻida joylashgan. Maʼlumotlarga koʻra, ushbu bino Turonbank mablagʻlari hisobiga qurilgan.
