Yaqin Sharqdagi noaniqliklar fonida oltin narxi koʻtarilmoqda, Bitcoin narxi esa sezilarli tushib ketdi
13 iyun kungi savdo sessiyalarida oltin narxi 1 unsiya uchun $3,425 darajasiga yetib, oxirgi bir necha oydagi eng yuqori nuqtani zabt etdi.
Bitcoin narxi esa bir kechada 4 foizdan koʻproqqa tushib, 24 soat ichidagi eng yuqori koʻrsatkich — $108,500 dan $103,556 gacha pasaydi.
Yaqin Sharqdagi keskin geosiyosiy vaziyat global moliya bozorlariga kuchli taʼsir oʻtkazmoqda. Xususan, investorlarning xavfsiz aktivlarga boʻlgan talabining ortishi fonida oltin narxi 2025 yilning eng yuqori choʻqqilaridan biriga yetdi, Bitcoin esa keskin pasaydi.
13 iyun kungi savdo sessiyalarida oltin narxi 1 unsiya uchun $3,425 darajasiga yetib, oxirgi bir necha oydagi eng yuqori nuqtani zabt etdi. Bu koʻtarilishning asosiy sabablari orasida Isroil va Eron oʻrtasidagi harbiy keskinlikning kuchaygani hamda AQSh Federal rezerv tizimining (Fed) foiz stavkasini tushirishi kutilayotgani mavjud. Mazkur omillar investorlar orasida xavotirni kuchaytirib, kapital oqimini xavfsiz deb koʻriladigan oltinga yoʻnaltirishga undamoqda.
Zanier Metals kompaniyasining vitse-prezidenti va katta metallar strategisti Piter Grant bu vaziyatga quyidagicha izoh berdi:
"Oltin narxi geosiyosiy xavf-xatarlar kuchaygan bir paytda ketma-ket ikkinchi kun koʻtarilmoqda. Agar u $3,400 darajasini yana bosib oʻtsa, $3,417 va $3,431 darajalaridagi kichik texnik toʻsiqlar qoladi. Ammo, bu — yangi tarixiy rekordlarga yoʻl ochishi mumkin".
Geosiyosiy tanglik kripto valyutalarga ham taʼsir qildi. Payshanba kuni kechqurun Isroil Eronning Tehron va Tabriz shaharlari yaqinidagi harbiy infratuzilmasiga havo hujumlarini amalga oshirdi. Rasmiy Tel-Aviv bu hujumni oldindan ogohlantiruvchi zarba deb atab, Eron tomonidan boʻlishi mumkin boʻlgan tahdidlarga javob sifatida izohladi.
Natijada, Bitcoin narxi bir kechada 4% dan koʻproqqa tushib, 24 soat ichidagi eng yuqori koʻrsatkich — $108,500 dan $103,556 gacha pasaydi (CoinGecko maʼlumotlariga koʻra). Bu holat investorlar orasida xavfli aktivlardan qochish kayfiyatining kuchayganini koʻrsatadi.
