UzNIF Toshkent va London fond birjalarida IPO boshlanganini eʼlon qildi

Oʻzbekiston Respublikasi Milliy investitsiya jamgʻarmasi (UzNIF) oʻzining boshlangʻich ommaviy taklifini (IPO) rasman boshladi. Taklif doirasida kompaniya aksiyalari va global depozitar tilxatlari (GDR) investorlarga taqdim etilmoqda.

Taklif bugun 29-apreldan boshlanib, 12-mayga qadar davom etadi. Taklif narxi har bir GDR uchun 25 AQSh dollari, oddiy aksiya uchun esa 4,65 soʻm etib belgilangan. Shu baholash asosida kompaniya umumiy qiymati qariyb 1,95 mlrd dollarga teng deb baholanmoqda.

IPO doirasida kompaniya ustav kapitalining taxminan 30 foizi sotuvga chiqarilmoqda, barcha qimmatli qogʻozlar esa yagona aksiyador — davlat nomidan Iqtisodiyot va moliya vazirligi tomonidan taklif etilmoqda. Bu esa IPOdan tushadigan mablagʻlar toʻgʻridan-toʻgʻri kompaniyaga emas, balki sotuvchi aksiyadorga yoʻnaltirilishini anglatadi.

Taklif ikki asosiy yoʻnalishda amalga oshiriladi. Birinchisi mahalliy bozor boʻlib, unda aksiyalar Toshkent fond birjasi orqali Oʻzbekiston va ayrim boshqa hududlardagi institutsional hamda chakana investorlar uchun taklif etiladi. Ikkinchi yoʻnalish — xalqaro bozor boʻlib, unda GDRlar xorijiy institutsional investorlar uchun London fond birjasida joylashtiriladi.

Xalqaro qiziqish allaqachon shakllangan. Xususan, BlackRock, Franklin Resources va boshqa yirik fondlar umumiy hisobda taxminan 300 mln dollarlik GDR xarid qilish boʻyicha “cornerstone” kelishuvlarga erishgan.

Mahalliy investorlar uchun ham muhim imtiyozlar nazarda tutilgan.

Jismoniy shaxslar 12 mlrd soʻmgacha boʻlgan buyurtmalar boʻyicha 5 foizlik chegirma bilan aksiyalarni 4,41 soʻmdan sotib olishi mumkin. Chakana investorlar aksiyalarni mahalliy brokerlar orqali yoki 200 mln soʻmgacha boʻlgan buyurtmalar uchun Jett platformasi orqali xarid qilishi mumkin. Shu bilan birga, investorlarga IPOda ishtirok etish uchun oldindan brokerlik hisobvaraqlarini ochish tavsiya etilmoqda.

Taklif yakunlari va yakuniy taqsimot 13-may atrofida eʼlon qilinadi. GDRlar boʻyicha shartli savdolar London fond birjasida 13-maydan boshlanishi, toʻliq savdolar esa 18-maydan yoʻlga qoʻyilishi kutilmoqda. Shu sanadan boshlab UzNIF aksiyalari Toshkent fond birjasida ham erkin muomalaga chiqariladi.

IPOning xalqaro qismi Jefferies International Limited tomonidan bosh global koordinator sifatida boshqarilmoqda, shuningdek bir qator xalqaro moliyaviy institutlar bookrunner sifatida jalb qilingan. GDR dasturi boʻyicha depozitariy bank sifatida The Bank of New York Mellon tayinlangan.