Toshkent supermarketlaridagi baʼzi oziq-ovqat mahsulotlari narxi arzonladi
Eng koʻp narx tushishi kartoshkada kuzatilgan boʻlsa, pomidor narxi yuqorilagan.
Makroiqtisodiy va hududiy tadqiqotlar instituti (MHTI) tomonidan 2025 yil mart oyida Toshkent shahridagi yirik supermarketlarda 21 turdagi asosiy oziq-ovqat mahsulotlari narxlari monitoringi oʻtkazildi.
Olingan natijalar baʼzi mahsulotlar narxida pasayish kuzatilganini, ayrimlarida esa narxning oshganligini koʻrsatdi. Bir qator mahsulotlarning narxi esa oʻzgarishsiz qolgan.
Monitoring natijalariga koʻra, 6 nomdagi oziq-ovqat mahsuloti minimal narxlari pasaygan. Xususan, kartoshkaning minimal narxi 19,8 foiz, sariq piyozniki 10,3 foiz, qizil sabziniki 3,4 foiz, tuxumniki 2,1 foiz, bananniki 0,9 foiz, kungaboqar yogʻiniki 0,6 foiz pasaygan.
7 nomdagi mahsulot boʻyicha minimal narxlar oshgan. Ayniqsa, pomidor narxida eng katta oʻsish qayd etildi. Bu mavsumiy omil bilan bogʻliq. Pasayishning asosiy sababi bozor holati va import bilan bogʻliq omillar hisoblanadi.
8 nomdagi mahsulotning eng past narxlari oʻzgarishsiz qolgan. Bular - bugʻdoy uni, guruch, makaron, oqbosh karam, olma, tovuq goʻshti (file), sut va shakardir.
Avvalroq, fevral oyida yillik inflyatsiya 10 foizdan oshgani xabar berilgan edi.
