Toshkent aeroportida smartfonlarni rasmiylashtirishga qoʻyilgan cheklov bekor qilindi
Bugundan xorijdan olib kelinayotgan telefonlar yana odatdagi tartibda bojxonadan oʻtkazilmoqda. Vaqtincha olib qolingan bir necha yuzta qurilmani egalariga qaytarish boshlandi.
Bu haqda Bojxona qoʻmitasi matbuot kotibi Husan Tangriyev Kontent markazida oʻtkazilgan matbuot anjumanida maʼlum qildi. Uning aytishicha, Toshkent xalqaro aeroportida UzIMEI mutaxassislari doimiy ishlay boshladi.
Ular zarurat boʻlganda bojxona xodimlariga IMEI kodi haqiqiyligini, qaysi qurilmaga tegishli ekanini va mobil tarmoqda avval qayd etilgan-etilmaganini aniqlashda yordam beradi
Qoʻmita bir kun avval IMEI kodlarini tekshirish tartibiga aniqlik kiritilguniga qadar rasmiylashtirishni vaqtincha toʻxtatganini bildirgan edi. Idora buni qimmat smartfonlarni arzon qurilma sifatida deklaratsiya qilish va IMEI kodlarini almashtirish holatlari bilan izohladi. Bojxona qoʻmitasining 10 noyabrdagi bayonoti
Bojxona qoʻmitasi majburiy 30 kunlik saqlov va tezlashtirilgan rasmiylashtirish uchun qoʻshimcha toʻlov joriy etilganini rad etgan.
