Samsung’ning yangi S25 seriyasi qanchalik yaxshi?
Kompaniya 22 yanvar kuni Qualcomm chiplari va Google’ning sunʼiy intellekt modeliga asoslangan yangi Galaxy S25 smartfonlarini taqdim etdi.
Galaxy S25 seriyasidagi asosiy yangilanishlar
Ishlash samaradorligi
Seriya Galaxy uchun moʻljallangan Snapdragon 8 Elite chipseti bilan jihozlangan boʻlib, u Qualcomm’ning eng kuchli protsessoridir. Chipset unumdorlik, samaradorlik va ulanish imkoniyatlarini sezilarli darajada yaxshilaydi. Dastlabki sinovlar shuni koʻrsatmoqdaki, Galaxy S25 Ultra koʻp funksiyali vazifalarda oʻzidan oldingi modeldan va hatto iPhone 16 Pro Max kabi raqiblaridan ham oʻzib ketmoqda. Seriyaning barcha modellarida 12 Gb operativ xotira mavjud boʻlib, bu bir vaqtning oʻzida bir nechta dasturlar bilan qotishlarsiz ishlashni taʼminlaydi.
Sunʼiy intellekt (AI) integratsiyasi
S25 seriyasi Android 15 va One UI 7 asosida ishlab, Galaxy AI nomi ostida takomillashtirilgan sunʼiy intellekt imkoniyatlarini taqdim etadi. Bu imkoniyatlarga kengaytirilgan nusxa koʻchirish-joylash funksiyalari va vazifalarni ketma-ket bajarish uchun AI Select kabi xususiyatlar kiradi. Samsung yetti yil davomida operatsion tizim va xavfsizlik yangilanishlarini taʼminlashni vaʼda qilmoqda, bu esa uzoq muddatli qoʻllab-quvvatlash nuqtai nazaridan tahsinga sazovordir.
Dizayn oʻzgarishlari
Samsung S25 seriyasida avvalgi dizaynni saqlab qolib, faqat Ultra modellariga biroz oʻzgartirish kiritdi. Smartfonlar biroz yupqaroq boʻlib, qalinligi 7,2 millimetrni tashkil qiladi. Bundan tashqari, smartfon qirralari ham biroz yumaloqlashgan. Koʻpchilik buni iPhone’dan ilhomlangan dizayn deb atamoqda.
Kamera yangilanishlari
S25 Ultra’da yangi 50 MP ultra-keng obʼektiv qoʻshilgan boʻlib, keng burchak va makro suratga olish sifatini yaxshilaydi. S25 va S25+ modellari esa oʻtgan yildagi 50 MP keng obʼektiv, 10 MP 3x telefoto linza va 12 MP ultrakeng obʼektivni saqlab qolgan.
S25 va S25+ modellari S24 qatorlari bilan bir xil ekran oʻlchami va kamera konfiguratsiyasiga ega. S25 Ultra biroz yangilangan dizaynga ega boʻlsa-da, oddiy foydalanuvchi tashqi dizaynda unchalik katta farqlarni sezmaydi.
Ultra ingichka – S25 Edge
Samsung, shuningdek, Kaliforniyadagi tadbir yakunida flagman modellarining yupqaroq versiyasi Galaxy S25 Edge’ni namoyish etdi. Smartfon faqatgina ikkita kameraga ega boʻlib, ulardan bittasi 200 MPlik kamera bilan jihozlangan.
Smartfonning aniq sotuvga chiqish sanasi maʼlum emas, lekin taxminlarga qaraganda, qurilma shu yilning may oylarida xaridorlarga taqdim etiladi. Avvalroq, Samsung bunday smartfon ustida ishlayotgani haqida xabar bergan edik.
