Samsung Galaxy S25 Slim: ultra-ingichka smartfonlar poygasida yangi raqobatchi
Samsung’dan iPhone 17 Air chiqarilishiga javob sifatida koʻrilayotgan smartfonning texnik xususiyatlari maʼlum boʻldi. Yangi model Ultra liniyasidagidek 200 MP kamera bilan jihozlanishi kutilmoqda.
Smartfon bozorida eʼtibor kichik qurilmalardan ultra-ingichka dizaynlarga qarata oʻzgarmoqda. Samsung oʻzining flagman modeli Galaxy S25’ning yanada nozik versiyasini ishlab chiqmoqda, u Galaxy S25 Slim deb nomlanishi mumkin. Bu yangi qurilma Apple’ning yaqinlashib kelayotgan iPhone 17 Air modeliga toʻgʻridan-toʻgʻri raqobatchi sifatida koʻrilmoqda.
Soʻnggi mish-mishlar ortidan Galaxy S25 Slim’ning texnik xususiyatlari, dizayn va chiqarilish sanasi boʻyicha yangi maʼlumotlar oshkor boʻldi.
Galaxy S25 Slim smartfon dizaynida yangi meʼyorlarni oʻrnatib berishi mumkin. Insayderlarning xabar berishicha, qurilmaning qalinligi atigi 6 mm boʻladi — bu Galaxy S24’ning 7,6 mm qalinligidan ancha ingichka. Taqqoslash uchun, iPhone 17 Air qalinligi 6,25 mm boʻlishi kutilmoqda, bu esa ikkala qurilmani ham ultra-ingichka kategoriya qatoriga qoʻshadi.
Samsung qurilmaning nozik dizayniga qaramay, unga 4,700 mA/soatdan 5,000 mA/soatgacha sigʻimga ega batareyalarni oʻrnatmoqchi. Hozirgi Galaxy S24 da bu miqdor 4,000 mA/soatni tashkil qiladi.
Galaxy S25 Slim 6,66 dyuymli displey bilan jihozlanadi, bu esa Galaxy S24+’ning 6,7 dyuymli ekrani bilan deyarli bir xil.
Fotografiya ishqibozlari uchun qurilma quyidagi kuchli kamera tizimiga ega boʻlishi kutilmoqda:
- 200 MP asosiy kamera
- 50 MP ultra keng kamera
- 50 MP telefoto 3,5 x optik zum bilan.
Galaxy S25 Slim Snapdragon 8 Elite SoC chipi bilan jihozlanishi kutilmoqda, bu Qualcomm’ning eng yangi va eng kuchli protsessori hisoblanadi. U qurilmani oʻyinlar, koʻp vazifali ishlar va resurslarni talab qiluvchi dasturlar uchun mukammal darajada ishlashini taʼminlaydi.
Standart Galaxy S25 2025 yilning yanvarida taqdim etilishi kutilmoqda. Galaxy S25 Slim esa bir oz kechroq, 2025 yilning 2-choragida chiqarilishi mumkin. Insayder Debayan Royʼning maʼlumotlariga koʻra, ushbu model SM-S937x/DS model raqamiga ega boʻladi.
Samsung odatda oʻrta sinfdagi Galaxy A va Galaxy FE seriyalari uchun shunday bosqichma-bosqich chiqarish strategiyasidan foydalanadi. Biroq, ultra-ingichka smartfonlar atrofidagi qiziqish sababli, kompaniya bu borada oʻz rejasiga oʻzgartirishlar kiritishi ehtimoldan xoli emas.
Maʼlumot oʻrnida, Apple’ning Iphone 17 Air modeli 2025 yilning 2-yarimida chiqarilishi kutilmoqda.
