Rekord foydadan keyin oʻsish: “Ipoteka-bank”ning bozor kapitalizatsiyasi 1,6 mlrd dollardan oshdi
Bankning oddiy aksiyalari soʻnggi ikki savdo kunida 23,1 foizga qimmatlashib, 4,63 soʻmga yetdi. Natijada bozor kapitalizatsiyasi qariyb 1,64 mlrd dollarni tashkil etdi.
Oʻsish bankning toʻqqiz oylik sof foydasi 2 trln soʻmdan oshgani haqidagi moliyaviy natijalar eʼlon qilinganidan keyin ham davom etmoqda.
Ayni paytda “Ipoteka-bank” Oʻzbekiston fond bozorida likvid oddiy aksiyalar orasida bozor kapitalizatsiyasi boʻyicha eng yirik emitent boʻlib qolmoqda.
“Ipoteka-bank”ning bozor kapitalizatsiyasi 15 oktabrdagi savdolar davomida 19,59 trln soʻmga yetdi. Bu haqda “Toshkent” respublika fond birjasi maʼlumotlarida keltirilgan.
Markaziy bankning shu kun uchun belgilangan kursi asosida hisoblaganda, ushbu qiymat qariyb 1,64 mlrd dollarga teng.
IPTB tikeri ostida savdo qilinadigan bank oddiy aksiyalar narxi 4,63 soʻmni tashkil etgan. Kun boshida bu koʻrsatkich 4,25 soʻm boʻlgan, yaʼni aksiyalar 0,38 soʻmga yoki 8,94 foizga qimmatlashgan.
KAP DEPO hisob-kitobiga koʻra, “Ipoteka-bank” Oʻzbekiston fond bozorida likvid oddiy aksiyalar orasida bozor kapitalizatsiyasi boʻyicha eng yirik emitent boʻlib qolmoqda.
Aksiyalarning soʻnggi qimmatlashuvi bankning toʻqqiz oylik moliyaviy natijalari eʼlon qilinishi fonida kuzatilmoqda. Yanvar–sentabrda “Ipoteka-bank” 2 trln soʻmdan ortiq sof foyda olgan. Oʻtgan yilning mos davrida bu koʻrsatkich 102,5 mlrd soʻm boʻlgan. Demak, sof foyda 19,5 baravardan koʻproq oshgan.
Moliyaviy natijalar haqidagi xabar fonida “Ipoteka-bank” aksiyalari soʻnggi ikki savdo kunida 23,1 foizga qimmatlashdi. Xususan, 13-oktabr yakunida 3,76 soʻm boʻlgan oddiy aksiyalar narxi 15-oktabr soat 16:02 holatiga 4,63 soʻmga yetdi. Shu davrda bir dona aksiya qiymati 0,87 soʻmga oshdi.
