Raqobat qoʻmitasi taksi narxlarining bir necha barobar oshishini oʻrganmoqda

Raqobat qoʻmitasi taksi agregatorlarida xizmat narxlarining oshishi va insofsiz raqobat alomatlari yuzasidan oʻrganish boshladi. Bu haqda qoʻmita matbuot xizmati xabar berdi.

Maʼlum qilinishicha, soʻnggi kunlarda yirik taksi agregatorlari faoliyatida texnik nosozliklar kuzatilgan. Buning ortidan raqobatchi platformalarda ham tigʻiz vaqtlarda taksi narxlari bir necha barobargacha oshgan va jamoatchilik eʼtirozlariga sabab boʻlgan.

Oʻrganish davomida narxlar oshirilishining asosliligi hamda raqobat toʻgʻrisidagi qonunchilik talablariga rioya etilishiga eʼtibor qaratilmoqda.

Shu munosabat bilan qoʻmita agregatorlardan dasturdagi narxlarni shakllantiruvchi algoritm sozlamalarini qayta koʻrib chiqish, yoʻl haqining keskin va sunʼiy oshishining oldini olish choralarini koʻrishni soʻragan.

Haydovchilar bilan hisob-kitoblarga oid muammolarni ham bartaraf etish lozimligi bildirilgan. Xususan, agregatorlardan:

• haydovchilarning mablagʻlarini oʻz hisoblariga oʻtkazishdagi nosozliklarni bartaraf etish;
• asossiz bloklangan haydovchilarni blokdan chiqarish;
• bajarilgan buyurtmalar uchun toʻlanishi koʻzda tutilgan barcha bonuslarni qayta hisoblab, toʻlab berish;
• haydovchilar va isteʼmolchilar uchun texnik yordam markazlarining sutka davomida uzluksiz ishlashini taʼminlash soʻralgan.

Bundan tashqari, qoʻmita agregatorlarni raqobatchilarga nisbatan insofsiz raqobat harakatlariga yoʻl qoʻymaslikka chaqirgan.

Qoʻmita raqobat qonunchiligi yoki isteʼmolchilar huquqlari buzilgani aniqlansa, belgilangan tartibda tekshirish oʻtkazilishi va tegishli choralar koʻrilishini bildirgan.