Prezident Markaziy bank va davlat banklari rahbarlari faoliyatiga eʼtiroz bildirdi
Shavkat Mirziyoyev banklarning mahallalardagi ishidan mutlaqo norozi ekanini bildirdi. Markaziy bankning hududiy rahbarlari va davlat banklari filiallari boshliqlariga natija koʻrsatish uchun uch oy muddat berildi. Oʻzgarish qila olmagan rahbarlar lavozimini tark etadi.
Prezident Shavkat Mirziyoyev raisligida hudud va tarmoqlarda iqtisodiy oʻsishni taʼminlash boʻyicha birinchi yarim yillik natijalar hamda yil oxirigacha moʻljallangan ustuvor vazifalarga bagʻishlangan videoselektor yigʻilishi oʻtkazilmoqda.
Yigʻilishda davlat rahbari banklarning mahallalardagi faoliyatini keskin tanqid qildi. Shu munosabat bilan Markaziy bankning hududiy boshqarmalari rahbarlari va davlat banklarining filial boshliqlari faoliyatiga qatʼiy eʼtiroz bildirildi.
Viloyat va tuman banklari hamda mahalla uyushmalari uchun joriy yil sinov va amaliy attestatsiya yili boʻlishi belgilandi.
Ularning faoliyati keyingi uch oyda erishilgan aniq natijalar asosida baholanadi. Mahallalarda oʻzgarish qila olgan rahbarlar faoliyatini davom ettiradi, natija koʻrsatmaganlari esa lavozimidan ketadi.
Bosh prokuratura va Hisob palatasiga har bir mahallada amalga oshirilayotgan ishlar hamda yuz berayotgan oʻzgarishlarni muntazam nazorat qilish topshirildi.
