Oʻzbekistonda qaysi banklarning kartalari Apple Pay va Google Pay’da ishlaydi?
Bugundan mahalliy bank kartalarini Apple Wallet va Google Wallet’ga ulab, smartfon orqali kontaktsiz toʻlov qilish imkoniyati paydo boʻldi. Google Pay roʻyxatida toʻqqizta, Apple Wallet’da esa sakkizta bank koʻrsatilgan. Hozircha xizmatlar Visa va Mastercard kartalarini qoʻllab-quvvatlamoqda.
27 oktabrdan Oʻzbekistonda chiqarilgan bank kartalarini Apple Pay va Google Pay’ga ulash boshlandi.
Google’ning rasmiy maʼlumotiga koʻra, Google Wallet’ga quyidagi banklarning kartalarini ulash mumkin:
| Bank | Qoʻllab-quvvatlanadigan kartalar |
|---|---|
| AVO Bank | Mastercard debet |
| Octobank | Visa va Mastercard kredit hamda debet |
| Uzum Bank | Visa kredit |
| TBC Bank | Visa va Mastercard kredit hamda debet |
| Aloqabank | Mastercard debet, Visa kredit va debet |
| Kapitalbank | Visa va Mastercard kredit hamda debet |
| Ipak Yoʻli Bank | Mastercard debet, Visa kredit va debet |
| Oʻzmilliybank | Mastercard debet, Visa kredit va debet |
| Orient Finans Bank | Mastercard kredit va Visa debet |
Google kartaning raqamli hamyon bilan ishlashini uni chiqargan bank belgilashini qayd etgan. Kontaktsiz toʻlov uchun NFC texnologiyasiga ega Android smartfon va Google Wallet ilovasi kerak.
Apple Pay’da qaysi banklar bor?
Apple Wallet’da Oʻzbekistondagi sakkizta bank koʻrsatilgan. Ularning quyidagi toʻlov tizimlariga tegishli kartalarini ulash mumkin:
| Bank | Koʻrsatilgan toʻlov tizimlari |
|---|---|
| Uzum Bank | Visa |
| Orient Finans Bank | Visa va Mastercard |
| Oʻzmilliybank | Visa va Mastercard |
| Kapitalbank | Visa va Mastercard |
| Hamkorbank | Visa |
| Ipak Yoʻli Bank | Visa va Mastercard |
| TBC Bank | Visa va Mastercard |
| Octobank | Visa va Mastercard |
Apple roʻyxatdagi banklarning ayrim kartalari qoʻllab-quvvatlanmasligi mumkinligini bildiradi. Muayyan kartani ulash imkoniyatini uni chiqargan bankdan aniqlashtirish tavsiya etiladi.
Banklar yangi xizmat uchun aksiyalarni ham tayyorlagan. TBC Bank Osmon Mastercard kredit kartasi bilan Apple Pay orqali qilingan birinchi kontaktsiz xaridga 100 foiz, koʻpi bilan 50 ming soʻm keshbek taklif qilmoqda. Aksiya shartlariga koʻra, u 30 noyabrgacha amal qiladi.
