Oʻzbekistonda har bir katta yoshli aholiga oʻrtacha 3,2 ta bank kartasi toʻgʻri keladi
Shunga qaramay, mamlakatda chiqarilgan milliy bank kartalarining faqat 53 foizidan soʻnggi 12 oy davomida faol foydalanilgan.
Markaziy bankning moliyaviy ommaboplik boʻyicha ilk milliy indeksiga koʻra, Oʻzbekistonda katta yoshli aholining 83 foizida bank kartasi mavjud.
Hisobotdagi eng qiziq koʻrsatkichlardan biri bir katta yoshli aholiga oʻrtacha 3,2 ta bank kartasi toʻgʻri kelayotgani. Yaʼni kartalar soni boʻyicha bank xizmatlari aholiga ancha keng kirib borgan.
Biroq kartalarning koʻpligi ulardan faol foydalanilayotganini anglatmaydi. Markaziy bank maʼlumotlariga koʻra, soʻnggi 12 oy davomida milliy bank kartalarining faqat 53 foizi faol ishlatilgan. Demak, muomaladagi kartalarning qariyb yarmi amalda nofaol qolmoqda.
Shu bilan birga, katta yoshli aholining qariyb 77 foizida faol internet-banking profili mavjud. Mobil internet orqali toʻlovlarni amalga oshirish imkoniyatiga ega aholi ulushi esa 86 foizdan oshadi.
Raqamli toʻlovlarning oʻzida ham muayyan nomutanosiblik bor. Jismoniy shaxslar amalga oshirgan toʻlov operatsiyalarining 69 foizi P2P — bir shaxsdan boshqa shaxsga pul oʻtkazmalari hissasiga toʻgʻri keladi.
Natijada Markaziy bank toʻlov xizmatlaridan amalda foydalanish darajasini 100 balldan atigi 34 ball bilan baholagan.
