Oʻzbekiston oltin sotib olish boʻyicha dunyoda uchinchi oʻrinni egalladi
Oʻzbekiston Markaziy banki 2026 yilning yanvar–sentabr oylarida oltin zaxiralarini 56 tonnaga oshirib, dunyodagi eng yirik uchta xaridordan biriga aylandi. Sentabr oyining oʻzida yana 7 tonna oltin sotib olingan. Bu haqda Jahon oltin kengashining 4 noyabrda eʼlon qilingan hisobotida maʼlum qilindi.
Jahon oltin kengashi (World Gold Council) maʼlumotlariga koʻra, 2026 yilning toʻqqiz oyida markaziy banklar tomonidan rasman qayd etilgan sof oltin xaridlari 228 tonnani tashkil etgan. Bu oʻtgan yilning mos davriga nisbatan 7 foizga kam.
Eng koʻp oltin xarid qilgan davlat Polsha boʻlib, mamlakat markaziy banki yil boshidan buyon zaxiralarini 123 tonnaga koʻpaytirgan. Ikkinchi oʻrinni 103 tonna bilan Xitoy, uchinchi oʻrinni esa 56 tonna bilan Oʻzbekiston egallagan.
Sentabr oyida ham Oʻzbekiston yirik xaridorlar qatorida boʻlgan. Markaziy bank bir oyda 7 tonna oltin sotib olib, Polsha (25 tonna) va Xitoydan (23 tonna) keyin uchinchi oʻrinni egallagan.
Keyingi oʻrinlarda Qozogʻiston (5 tonna), Iordaniya (4 tonna), Chexiya (2 tonna) va Boliviya (1 tonna) joylashgan.
Umuman, sentabr oyida dunyo markaziy banklarining sof oltin xaridlari 61 tonnaga yetgan. Bu 2026 yil boshidan buyon kuzatilgan eng yuqori oylik koʻrsatkich hisoblanadi.
