Oʻzbekiston avtomobil bozorida avgust oyida pasayish kuzatildi
Oʻzbekistonda 2025 yil avgustida avtomobil savdosi 90 ming donani tashkil etib, iyul oyiga nisbatan 9,5% ga kamaydi. Eng katta pasayish Toshkent viloyati, Xorazm va Qashqadaryoda kuzatildi.
2025 yil avgustida mamlakat avtomobil bozorida savdolar biroz qisqardi. Bu haqda Iqtisodiy tadqiqotlar va islohotlar markazi maʼlum qildi.
Maʼlumotlarga koʻra, oy davomida yengil avtomobillar savdosi 90 ming donani tashkil etib, iyul oyiga nisbatan 9,5% ga kamaydi. Eng sezilarli pasayish Toshkent viloyati, Xorazm va Qashqadaryoda qayd etildi.
Birlamchi bozor
Yangi yengil avtomobillar segmentida ham pasayish kuzatildi. Avgust oyida 37,6 ming dona avtomobil sotilib, bu iyul oyiga qaraganda 2% kamdir. Shunga qaramay, mahalliy ishlab chiqarilgan avtomobillar bozorda yetakchilikni saqlab qoldi — 32,6 ming dona mashina sotilgan boʻlib, bu koʻrsatkich 0,8% ga qisqardi. Import qilingan yangi avtomobillar savdosi esa 4,9 ming donani tashkil etdi, bu iyulga nisbatan 9,4% kam.
Ikkilamchi bozor
Avtomobil bozorining ikkilamchi segmentida ham savdo hajmi qisqardi. Avgust oyida 52,7 ming dona avtomobil sotilgan boʻlib, bu oʻtgan oyga nisbatan 14,3% kamdir.
Elektromobillar
Shu bilan birga, elektromobillar segmenti ijobiy dinamikani koʻrsatdi. Ikkilamchi bozorda 2,7 mingta elektromobil sotildi, bu iyulga nisbatan 0,6% koʻp. Yillik hisobda esa savdolar 4,6 barobar oshgani qayd etildi.
