OpenAI 1 mlntagacha token bilan ishlay oluvchi GPT-4.1 modelini taqdim qildi
Kompaniya taʼkidlashicha, GPT-4.1 hozirgacha mavjud eng kuchli model boʻlgan GPT-4o’dan barcha jihatlarda ustunlik qiladi.
OpenAI kompaniyasi oʻzining eng yangi sunʼiy intellekt modeli — GPT-4.1’ni taqdim etdi. Bu model avvalgi avlod — GPT-4o’dan ham samaraliroq boʻlib, kod yozish, koʻrsatmalarga amal qilish va katta hajmdagi matnlar yoki suhbatlarni tushunishda sezilarli darajada yaxshilangan.
Kompaniyaning bildirishicha, GPT-4.1 ayni vaqtda mavjud boʻlgan eng kuchli model boʻlib, barcha asosiy jihatlarda GPT-4o’dan ustun turadi. Model ishlab chiquvchilar uchun API platformasida ishga tushirilgan.
GPT-4.1 modelining eng katta yangiliklaridan biri — 1 million tokengacha boʻlgan maʼlumot hajmini qayta ishlay olishi. Bu taxminan 750 mingta soʻzga teng boʻlib, modelni katta hajmdagi hujjatlar, hisobotlar yoki murakkab kod bazalari bilan ishlash uchun nihoyatda qulay qiladi.
Sinov natijalariga koʻra, GPT-4.1 kod yozish vazifalarida GPT-4o’dan 21%, GPT-4.5’dan esa 27% samaraliroq ishlaydi. Bundan tashqari, u foydalanuvchi koʻrsatmalariga aniqroq amal qiladi va uzoq kontekstli matnlar yoki suhbatlarda izchillikni saqlab qolishda ham ustunlikka ega.
OpenAI shuningdek, GPT-4.1 modelining yengilroq variantlarini — GPT-4.1 MIni va GPT-4.1 Nano’ni ham taqdim etdi. Ular tezkorlik va resurs tejalishini talab qiladigan qurilma va ilovalar uchun moʻljallangan. Ushbu modellar kamroq hisoblash quvvatiga ega tizimlarda ham samarali ishlaydi.
Avvalroq, OpenAI Oʻzbekistonda soliq toʻlovchi sifatida roʻyxatdan oʻtgani xabar qilingan edi.
