Oltin narxi uch oy ichida ilk bor 4 ming dollardan pastga tushdi
Jahon bozorida oltinning bir troya unsiyasi narxi 3 975 dollargacha pasayib, iyul oyining oʻrtalaridan beri eng past darajaga tushdi. Qimmatbaho metall haftalik hisobda qariyb 4 foizga arzonlashdi va soʻnggi toʻrt oydagi eng katta haftalik yoʻqotishni qayd etishi mumkin.
23 oktabr kuni xalqaro bozorda oltin narxi keskin pasayishda davom etdi. Reuters maʼlumotlariga koʻra, savdolar davomida bir troy unsiyasi (31,1 gramm) oltinning narxi 3 975,23 dollargacha tushgan. Keyinchalik narx qisman tiklanib, 4 000,59 dollar atrofida shakllangan.
Oltinning arzonlashishiga jahon bozorida neft narxining koʻtarilishi va AQSh Federal zaxira tizimi (FZT) foiz stavkalarini yuqori darajada saqlab qolishi mumkinligi haqidagi kutilmalar sabab boʻlmoqda.
Xususan, Saudiya Arabistonidagi husiylar hujumlari ortidan energiya taʼminotida uzilishlar yuz berishi xavfi kuchaydi. Natijada Brent markali neft narxi besh oydan ortiq davrdagi eng yuqori darajaga chiqdi.
Jonli oltin narxi bilan quyida tanishishingiz mumkin:
Neftning qimmatlashishi inflyatsiya bosimini kuchaytirishi mumkin. Bu esa FZT tomonidan pul-kredit siyosatini yumshatish imkoniyatini cheklaydi. Yuqori foiz stavkalari odatda foiz daromadi keltirmaydigan oltinning investitsion jozibadorligini pasaytiradi.
Bozor ishtirokchilari FZT 27–28 oktabr kunlari boʻlib oʻtadigan yigʻilishda asosiy stavkani oʻzgarishsiz qoldirish ehtimolini 92 foizga baholamoqda. Dekabr oyida stavka oshirilishi ehtimoli esa 83 foizga yetgan.
Bundan tashqari, AQSh texnologiya kompaniyalari aksiyalarining arzonlashishi ham oltin bozoriga bosim oʻtkazmoqda. Ayrim investorlar fond bozoridagi yoʻqotishlarini qoplash uchun oltin va kumush aktivlarini sotishga majbur boʻlmoqda.
Oltin bilan bir qatorda boshqa qimmatbaho metallar ham arzonlashdi. Jumladan, kumush narxi 0,7 foizga pasayib, bir unsiya uchun 54,17 dollarni tashkil etdi. Platina va palladiy narxlarida ham pasayish kuzatildi.
