Mikrokreditbank yarim yilda 49 mlrd soʻm sof foyda koʻrdi
Bu koʻrsatkich oʻtgan yilning shu davriga nisbatan ancha yuqori — 2024 yilning yanvar-iyun oylarida bank sof foydasi atigi 3,5 milliard soʻmni tashkil qilgan edi. Sof foydadagi oʻsish 1 293 foizni tashkil qilmoqda.
Mikrokreditbank 2025 yilning birinchi yarim yilligiga oid moliyaviy hisobotini eʼlon qildi.
Unga koʻra, bank olti oy davomida 49 milliard soʻm sof foyda koʻrgan. Bu koʻrsatkich oʻtgan yilning shu davriga nisbatan ancha yuqori — 2024 yilning yanvar-iyun oylarida bank sof foydasi atigi 3,5 milliard soʻmni tashkil qilgan edi. Natijada, sof foyda 1293 foizga oshgan.
Bank mazkur davrda 2,5 trillion soʻmlik foizsiz daromad olgan. Bu ham oʻtgan yilning mos davriga nisbatan 29,2 foizga koʻproqdir. Foizli daromadlar esa 752,9 milliard soʻmni tashkil etgan.
Shuningdek, bank xodimlarining oylik ish haqi va boshqa xarajatlari uchun 296,2 milliard soʻm sarflagan. Davlat byudjetiga esa 13,6 milliard soʻm miqdorida daromad soligʻi toʻlangan.
2025 yil 1 iyun holatiga koʻra, Mikrokreditbankʼning umumiy kredit portfeli 19,6 trillion soʻmni tashkil etgan. Shundan 1,3 trillion soʻm yoki 6,5 foizi muammoli kreditlar (NPL – non-performing loans) hisoblanadi.
Avvalroq, Pinkod “Ipoteka bank” birinchi yarim yillikda qariyb 400 mlrd soʻm zarar koʻrgani haqida yozgan edi.
Shuningdek, banklar moliyaviy koʻrsatkichlari, shu jumladan, sof foydasi haqidagi muhim maʼlumotlar bilan mazkur havola orqali tanishish mumkin.
