Mikrokreditbank boshqaruv raisi oʻrinbosari Sodir Melibayev lavozimidan ketdi
Sodir Melibayev oʻz arizasiga koʻra boshqaruv raisi oʻrinbosarligidan ozod etildi, uning boshqaruv aʼzosi sifatidagi vakolati ham tugatildi. Maʼlumotlarga koʻra, u bankda IT boʻyicha maslahatchi lavozimiga tayinlangan.
Mikrokreditbank kuzatuv kengashi 17 sentabrdagi yigʻilishida Sodir Melibayevni oʻz xohishiga koʻra boshqaruv raisi oʻrinbosari lavozimidan ozod qilishga qaror qildi. Shuningdek, uning boshqaruv aʼzosi sifatidagi vakolati muddatidan oldin tugatilib, u bilan tuzilgan shartnomalar bekor qilindi.
Bankirlar uchun kanali maʼlumotiga koʻra, Melibayev Mikrokreditbank boshqaruvi raisining IT boʻyicha maslahatchisi lavozimiga tayinlangan. Bank eʼlon qilgan kuzatuv kengashi qarorida bu tayinlov qayd etilmagan.
Kuzatuv kengashi tasdiqlagan yangi boshqaruv tarkibida Malik Avazov rais, Baxadir Allaniyazov, Ikram Djumaniyazov va Ibroximjon Mamadjanov rais oʻrinbosari vazifasini bajaruvchi sifatida koʻrsatilgan. Tarkibdagi bir oʻrin vakant qolgan.
