Markaziy bank firibgarlik holatlaridan ogohlantirmoqda
Qayd etilishicha, Markaziy bankning Finlit loyihasi nomi ostida firibgarlik bilan shugʻullanuvchi insonlar aniqlangan.
Markaziy banki fuqarolarni Finlit.uz nomi ostida sodir etilayotgan firibgarlik holatlaridan ogohlantirmoqda. Aniqlanishicha, ayrim shaxslar ushbu nomdan foydalanib, noqonuniy moliyaviy xizmatlar taklif qilmoqda.
Shuni alohida taʼkidlash kerakki, @finlituzb va @finlituzb_ru sahifalari – Markaziy bankning Moliyaviy savodxonlik va ommaboplikni oshirish departamenti tomonidan yuritiladigan rasmiy sahifalar hisoblanadi.
Markaziy bank va Finlit.uz loyihasining asosiy maqsadi – aholining moliyaviy savodxonligini oshirishdir. Shu sababli, bu loyiha doirasida tashkil etiladigan barcha oʻquv darslari, seminar-treninglar, mahorat darslari va boshqa tadbirlar mutlaqo bepul tarzda oʻtkaziladi.
Shu bilan birga, Finlit.uz quyidagi xizmatlar bilan hech qachon shugʻullanmaydi:
- kredit berish;
- omonat qabul qilish;
- toʻlovlarni amalga oshirish;
- pullik moliyaviy maslahatlar koʻrsatish.
Agar sizda shubhali sahifalar yoki xabarlar yuzasidan savollar tugʻilsa, Finlit.uz administratoriga – @finlitteam orqali murojaat qilishingiz mumkin.
