Iyun oyida Oʻzbekistonda deflyatsiya kuzatildi
Milliy statistika qoʻmitasi maʼlumotlariga koʻra, 2025-yil iyun oyida mamlakatda deflyatsiya qayd etildi — isteʼmol narxlari 0,2 foizga pasaydi. Bu asosan sabzavot va dukkakli mahsulotlar narxining keskin tushishi bilan izohlanmoqda. Yil boshidan buyon umumiy inflyatsiya darajasi 4,2 foizni tashkil etdi.
Oʻzbekistonda iyun oyida mavsumiy deflyatsiya kuzatildi. Bu haqda Milliy statistika qoʻmitasi hisobotida keltirib oʻtilgan.
Oy davomida isteʼmol narxlari 0,2 foizga kamaydi. Bu may oyidagi keskin — 1,5 foizlik oʻsishdan soʻng roʻy berdi. Yilning birinchi yarmida inflyatsiya surʼati 4,2 foizni tashkil etib, 2024-yilning shu davriga nisbatan 1 foizga pasaydi.
Yillik inflyatsiya iyun oyida 8,7 foiz darajasida qolib, may oyidagi darajadan oʻzgarishsiz qoldi. Taqqoslash uchun bir yil avval bu koʻrsatkich 10,6 foizni tashkil qilgan edi.
Hududlar kesimida narxlar turlicha. Oy davomida narxlar faqat uchta hududda oshdi: Qoraqalpogʻiston (+0,2 foiz), Xorazm (+0,1 foiz) va Surxondaryo (+0,4 foiz). Toshkent shahri, Sirdaryo va Jizzax viloyatlarida esa deflyatsiya 0,4 foizni tashkil etdi.
Umumiy deflyatsiyaning asosiy sababi — oziq-ovqat mahsulotlari segmentidagi 1,2 foizlik narxlarning pasayishi boʻldi. Eng katta arzonlashuv sabzavot va dukkakli mahsulotlarda kuzatildi — 10,2 foizgacha.
Baqlajonlar narxi ikki baravardan koʻproqqa tushdi, pomidorlar 46,6 foiz arzonlashdi. Shuningdek, bulgʻor qalampiri (-38 foiz), bodring (-30,9 foiz), tarvuz (-27 foiz), karam (-23 foiz) va sarimsoq (-10,5 foiz) narxlari ham tushdi. Ayni vaqtda sabzi (+12,4 foiz) va sitrus mevalari (13,8−36,2 foiz) sezilarli qimmatlashdi. Shuningdek, tuxum (+5,3 foiz) va parranda goʻshti (+1,7 foiz) narxlari ham oshgan.
Yil boshidan buyon oziq-ovqat mahsulotlari narxi 1,7 foizga oshgan, 2024-yil birinchi yarmida esa aksincha, pasayish kuzatilgan edi. Soʻnggi 12 oyda oziq-ovqat mahsulotlari inflyatsiyasi 6 foizni tashkil etib, oʻtgan yilga nisbatan deyarli ikki baravar oshgan.
Sanoat tovarlari narxi oy davomida 0,2 foizga, oʻtgan iyunga nisbatan esa 7,5 foizga koʻtarildi. Aksar tovar toifalarida oʻsish surʼatlari may oyiga nisbatan past boʻldi.
Iyun oyida xizmatlar narxi oʻrtacha 0,8 foizga oshgan boʻlsa, yillik oʻsish 15,8 foizni tashkil etdi. Asosiy inflyatsion omil sifatida "kommunal sohadagi tariflarning liberallashuvi" koʻrsatilmoqda. Jumladan, Qoraqalpogʻiston, Xorazm, Andijon va Surxondaryo viloyatlarida suv taʼminoti va kanalizatsiya xizmatlari narxi oshgan.
Oʻrtacha hisobda, suv taʼminoti va uy-joyni saqlash xizmatlari boʻyicha narxlar 6,1 foizga oshgan. Shuningdek, tibbiy xizmatlar narxi 1,1−1,3 foiz atrofida qimmatlashgan.
