HUMO’ga yaqinda tayinlangan Aleksandr Sotnikov lavozimidan ketdi
Aleksandr Sotnikov HUMO boshqaruviga tayinlanganidan 44 kun oʻtib kompaniyadagi lavozimini tark etdi. Uning ketish sababi ochiqlanmagan.
HUMO toʻlov tizimi operatori — “Milliy banklararo protsessing markazi” AJ boshqaruv raisining birinchi oʻrinbosari Aleksandr Sotnikovning vakolatlari muddatidan oldin tugatildi.
Tegishli qaror kompaniya kuzatuv kengashi tomonidan 1 iyul kuni qabul qilingan. Ochiqlangan hujjatda Sotnikovning lavozimdan ketishiga nima sabab boʻlgani koʻrsatilmagan.
Aleksandr Sotnikov HUMO boshqaruviga joriy yilning 18 may kuni tayinlangan edi. Oʻshanda u kompaniya boshqaruv raisining oʻrinbosari lavozimini egallagandi. Shunday qilib, Sotnikov HUMOʻda qariyb bir yarim oy faoliyat yuritgan.
Ayni qaror bilan Rustam Karimov kompaniya ijro organi tarkibiga kiritildi. U HUMO’da biznes blokning boshqaruvchi direktori lavozimida faoliyat yuritadi.
Sotnikov HUMO’ga kelishidan avval Belarusdagi Bank protsessing markazini boshqargan. Bundan tashqari, u BELKART toʻlov tizimi, Belarus Milliy banki va “Belagroprombank”da rahbarlik lavozimlarida ishlagan.
Avvalroq Pinkod belorussiyalik bankirlar Oʻzbekiston bank va fintex tizimida rahbarlik lavozimlarni egallayotganiga eʼtibor qaratgan edi.
