Elektron pul oʻtkazmalaridagi yangi tartiblar mijozlarga qiyinchilik tugʻdirmaydi — Markaziy bank

Markaziy bank jinoiy faoliyatdan olingan daromadlarni legallashtirish va terrorizmni moliyalashtirishga qarshi kurashish maqsadida toʻlov tizimlari operatorlari, elektron pullar tizimi operatorlari va toʻlov tashkilotlari uchun ichki nazorat qoidalariga kiritilgan oʻzgartirish va qoʻshimchalar yuzasidan bildirilayotgan fikrlar boʻyicha rasmiy izoh berdi.

Mijoz uchun nima oʻzgaradi?

Markaziy bankning taʼkidlashicha, ushbu talab mijozlarga qoʻshimcha qiyinchilik tugʻdirmaydi. Chunki:

• Maʼlumotlar faqat toʻlov tashkilotlari va banklar oʻrtasida almashiladi;
• Mijozlardan qayta identifikatsiya yoki hujjat taqdim etish talab etilmaydi;
• Akkaunt ochilishida taqdim etilgan mavjud maʼlumotlar asosida avtomatik tarzda maʼlumot uzatiladi.

Yaʼni, mijoz oʻzining elektron pul oʻtkazmalarida hech qanday qoʻshimcha harakat amalga oshirishi shart emas.

Bu tartib, avvalo, elektron pul oʻtkazmalari orqali amalga oshirilishi mumkin boʻlgan noqonuniy faoliyatlarning oldini olish, moliyaviy operatsiyalarda shaffoflikni taʼminlash va elektron toʻlov tizimida xavfsizlikni mustahkamlashga xizmat qiladi.

Markaziy bankning taʼkidlashicha, mazkur choralar jahon standartlariga mos ravishda ishlab chiqilgan boʻlib, mamlakatda moliyaviy barqarorlik va xavfsizlikni taʼminlashda muhim ahamiyatga ega.