Donald Tramp AQShda oʻzining smartfon va mobil xizmat brendini ishga tushirdi
Smartfon T1 Phone deb nomlanadi va uning narxi $499 etib belgilangan. Qurilma hozirda $100 miqdoridagi oldindan toʻlov bilan buyurtma qilish uchun mavjud.
Bundan tashqari, Trump Mobile mobil aloqa xizmati ham taqdim etilgan boʻlib, u oyiga $47.45 turadigan “47-tarif” rejasini oʻz ichiga oladi.
16 iyun kuni AQSh prezidenti Donald Trampning biznes imperiyasini boshqaruvchi Trump Organization kompaniyasi yangi mobil aloqa xizmati va mobil telefon — Trump Mobile’ni ishga tushirganini eʼlon qildi. Bu haqda USA Today nashri xabar berdi.
Trump Mobile oʻzining asosiy tarif rejasini “47-tarif” deb nomlagan. Bu reja oyiga $47.45 turadi va Trampning birinchi hamda ikkinchi prezidentlik muddatlariga ishora qiladi. Tarif foydalanuvchilarga cheksiz qoʻngʻiroqlar, SMS va mobil internetdan foydalanish imkoniyatini taqdim etadi. Undan tashqari, 100 ta davlatga xalqaro qoʻngʻiroqlar bepul, harbiylar va ularning oilalari uchun esa uzoq masofali qoʻngʻiroqlar imtiyozli tarzda taqdim etiladi.
Xizmatlar qatoriga 24/7 avtomobil yoʻli yordam xizmati, telemeditsina xizmatlari (virtual tibbiy maslahatlar, ruhiy salomatlik yordami va dori-darmon buyurtmasi) ham kiritilgan.
Trump Mobile, shuningdek, Android operatsion tizimida ishlovchi T1 nomli yangi smartfonni ham taqdim etadi.
T qurilmasi Android 15 tizimida ishlaydi, 256 GB ichki xotira va 12 GB tezkor xotiraga ega. Telefon yuzni aniqlash va barmoq izi orqali blokdan chiqarish funksiyalari, USB-C porti hamda 3.5 mm quloqchin ulagichi bilan jihozlangan. Qurilmaning chakana narxi $499 etib belgilangan boʻlib, xaridorlar uni $100 oldindan toʻlov evaziga hozirdanoq buyurtma qilishlari mumkin. Rasmiy chiqish sanasi esa hali eʼlon qilinmagan.
Trump Mobile xizmatlari va qurilmalari toʻliq AQSh hududida ishlab chiqariladi va boshqariladi. Trump Organization vitse-prezidenti Erik Trampning aytishicha, kompaniya xorijdagi qoʻngʻiroq markazlaridan foydalanmaydi, balki barcha mijozlarga Missuri shtatining St. Louis shahridagi markaz orqali xizmat koʻrsatadi.
