Banklarga kredit berishda chek-list joriy etish va uni tasdiqlatish majburiyati yuklanishi mumkin
Markaziy bank kredit olish tartibida yangi talablarni taklif qilmoqda.
Agar loyiha qabul qilinsa, jismoniy shaxslar kredit rasmiylashtirishdan avval chek-listni toʻldirib, barcha shartlarga rozilik berishi majburiy boʻladi.
Shuningdek, banklarga kredit parametrlari koʻrsatilgan maydonchalarni avtomatik toʻldirish va «standart» belgilash kataklarini oʻrnatish taqiqlanadi.
Markaziy bank mijozlar bilan munosabatlarda banklar faoliyatining minimal talablariga oʻzgartirishlar kiritish boʻyicha loyiha ishlab chiqdi. Bu boʻyicha loyiha jamoatchilik muhokamasiga qoʻyildi.
Jismoniy shaxslar kredit olganida majburiyatlar bilan bogʻliq xavflar sanab oʻtiladigan chek-listlar joriy etilishi taklif qilinmoqda. Bank kreditni tasdiqlaganidan keyin, ammo kredit shartnomasini tuzishdan avval, ushbu chek-listni mijozga taqdim etishi lozim boʻladi.
Qarz oluvchi barcha bandlar bilan tanishib chiqishi va ularga roziligini tasdiqlashi kerak boʻladi. Toʻldirilmagan chek-listsiz kredit shartnomasini imzolashga yoʻl qoʻyilmaydi.
Hujjatda izohlar bilan birga toʻrtta shart keltiriladi:
- “Kredit — bu xarajat”;
- “Men kreditni qaytarish jadvalini diqqat bilan oʻrganib chiqdim”;
- “Mening daromadim kredit toʻlovlarini toʻlash imkonini beradi”;
- “Men kredit boʻyicha toʻlovlarni kechiktirish oqibatlaridan xabardorman”.
Agar qarz oluvchi bankda kredit rasmiylashtirayotgan boʻlsa, u chek-listdagi barcha shartlarni qabul qilganini belgilashi va imzo qoʻyishi kerak boʻladi. Agar kredit onlayn olinayotgan boʻlsa, barcha bandlarni belgilash va qabul qilish tugmasini bosish talab etiladi. Bunda tizim qabul qilingan sana va vaqtni, IP-manzil hamda qarz oluvchining identifikatorini saqlaydi.
Bundan tashqari, Markaziy bank banklarga mobil ilovalarda kredit parametrlari, jumladan, miqdori, muddati va oluvchining daromadlari haqidagi maʼlumotlarni avtomatik yuklashni taqiqlashni taklif qilmoqda.
Mijozning roziligini ifodalovchi “standart holatda” belgilangan belgilash kataklari (galochka) yoki boshqa tugmalarni oʻrnatish taqiqlanadi. Shartnoma (oferta) shartlari oʻqilganda qabul qilish tugmasi faqat mijoz hujjatni oxirigacha aylantirgandan keyin faollashishi kerak boʻladi.
Shuningdek, banklar kredit shartnomalarini oʻzgartirish va qarzlarni restrukturizatsiya qilish toʻgʻrisidagi arizalarni moliyaviy qiyinchiliklar, murakkab hayotiy vaziyat yoki fors-major holatlari sababli koʻrib chiqish tartibini tasdiqlashi kerak boʻladi. Ushbu hujjat bankning veb-saytida joylashtirilishi lozim.
