Banklardagi mikroqarzlar boʻyicha foiz stavkalari yil davomida qanday oʻzgardi?
2025 yilda Oʻzbekistonda mikroqarzlar boʻyicha oʻrtacha foiz stavkasi 34,9% dan 31,1% gacha pasaydi. Bu statistik maʼlumotlar eʼlon qilina boshlagandan beri eng past koʻrsatkichdir.
Oʻzbekistonda 2025-yil 2-iyuldan boshlab banklarning mikroqarzlar boʻyicha oʻrtacha foiz stavkalari muntazam eʼlon qilina boshlandi. Dastlabki maʼlumotlarga koʻra, iyul oyida mikroqarzlar boʻyicha bozor oʻrtacha stavkasi 34,9 foizni tashkil etgan edi.
Yil yakuniga kelib esa ushbu koʻrsatkich 31,1 foizgacha pasaydi. Bu statistik maʼlumotlar eʼlon qilina boshlaganidan buyon qayd etilgan eng past daraja hisoblanadi. Shunday qilib, atigi yarim yil ichida bozor boʻyicha oʻrtacha foiz stavkasi 3,8 foiz punktiga kamaydi.
Foiz stavkalarini sezilarli darajada tushirgan banklar
Yil davomida foizlarni eng keskin pasaytirgan bank sifatida Apex Bank ajralib turdi. Iyul oyida bozorning eng qimmat mikroqarz taklif etuvchilaridan biri boʻlgan bank, yil oxiriga kelib oʻrtacha stavkali banklar qatoriga qoʻshildi.
- Apex Bank: 40,0% → 31,9% (−8,1 foiz punkt)
- TBC Bank: 39,1% → 32,7% (−6,4 foiz punkt)
- Trastbank: 28,1% → 24,1% (stavkaning pasayishi bankni eng arzon kredit beruvchi banklar uchligiga olib chiqdi)
- Ipak Yuli Banki: 38,2% → 36,2%
Markaziy bankning dekabr oyi oxiridagi rasmiy statistik maʼlumotlarida TBC Bank keltirilmagan. Bu bank yil oxirida kreditlash hajmini qisqartirgan boʻlishi ehtimoli bilan izohlanadi. Shunga qaramay, mavjud soʻnggi maʼlumotlarga koʻra, bankda oʻrtacha foiz stavkasi 32,7 foiz boʻlgan.
Foiz stavkalarini oshirgan banklar
Ayrim banklarda, ayniqsa raqamli xizmatlar va tezkor onlayn kreditlarga ixtisoslashgan muassasalarda, yil davomida foiz stavkalarining oshgani kuzatildi.
- Tenge Bank: 39,0% → 42,7% Natijada bank bozordagi eng qimmat mikroqarz taklif etuvchi muassasaga aylandi.
- Anorbank: 38,5% → 41,3%
- Aloqabank: 21,4% → 23,5% Garchi stavkalar oshgan boʻlsa-da, bank hanuzgacha bozordagi eng arzon kredit beruvchi bank maqomini saqlab qolmoqda.
Qayerdan kredit olgan maʼqul?
29 dekabr holatiga koʻra, eng past foiz stavkalari:
- Aloqabank — 23,5%
- Trastbank — 24,1%
- Infinbank — 25,3%
Eng yuqori foiz stavkalari:
- Tenge Bank — 42,7%
- Anorbank — 41,3%
- Ipak Yuli Banki — 36,2%
