Apex Bank’dan ketgan Sharof Ikramov Garant bank boshqaruv raisiga birinchi oʻrinbosar boʻldi
Sharof Ikramov Garant bank boshqaruvi raisining birinchi oʻrinbosari lavozimiga tayinlandi. U bir necha kun avval Apex Bank boshqaruvi raisi oʻrinbosari lavozimidan ozod etilgan edi. Yangi tayinlov Markaziy bank bilan kelishilganidan soʻng rasman kuchga kiradi.
Sharof Renatovich Ikramov “Garant bank” AJ boshqaruvi raisining birinchi oʻrinbosari lavozimiga tayinlandi.
Mazkur tayinlov Oʻzbekiston Markaziy banki bilan kelishilganidan soʻng rasman kuchga kiradi.
Bundan avval Ikramov 2024 yil oktabridan buyon Apex Bank boshqaruvi raisi oʻrinbosari sifatida faoliyat yuritib kelayotgan edi. Biroq bank Kuzatuv kengashining 2026 yil 6 noyabrdagi qarori bilan uning vakolatlari muddatidan oldin tugatilgan.
Oʻsha yigʻilishda Apex Bank boshqaruvi raisi vazifasini vaqtincha bajarib kelgan Olga Numanovaning ham vakolatlari tugatilgan. Bank boshqaruvi raisi vazifasini vaqtincha bajarish Sherzod Madjitovga yuklatilgan.
Sharof Ikramov haqida
Sharof Ikramov 1983 yilda Toshkent shahrida tugʻilgan. U 2004 yilda Toshkent moliya institutining bakalavriat, 2007 yilda esa magistratura bosqichini tamomlagan.
Bank-moliya sohasida 20 yildan ortiq ish tajribasiga ega. Xususan, 2004–2021 yillarda Kapitalbankda turli lavozimlarda faoliyat yuritgan.
2021–2023 yillarda Bank Apelsin (keyinchalik Uzum Bank) boshqaruvi raisining birinchi oʻrinbosari boʻlib ishlagan. Shuningdek, Anorbank Kuzatuv kengashi raisi maslahatchisi lavozimini egallagan.
2024 yil oktabrida Apex Bank boshqaruvi raisi oʻrinbosari etib tayinlangan va 2026 yil noyabrigacha mazkur bankda faoliyat yuritgan.
Eslatib oʻtamiz, joriy yilning fevral oyida Garant bank boshqaruvi raisining avvalgi birinchi oʻrinbosarlaridan biri Bahodir Mirzayevning vakolatlari muddatidan oldin tugatilgan edi. U mazkur lavozimda 2025 yil noyabridan buyon ishlab kelayotgan edi.
