Adam Sentpeteri Ipoteka-bank boshqaruv raisi v.b. etib tayinlandi

“Ipoteka-bank” ATIBda boshqaruv raisi vazifalari vaqtincha Adam Sentpeteriga yuklatildi. Bu haqdagi qaror bank aksiyadorlarining yillik umumiy yigʻilishida qabul qilingan.

Qarorga koʻra, Sandro Rtveladze oʻz arizasiga asosan boshqaruv raisi lavozimidan ozod etilgan. Uning oʻrniga bank boshqaruvi raisi oʻrinbosari Adam Sentpeteri vaqtincha boshqaruv raisi vazifalarini bajaradi.

Shuningdek, bank kuzatuv kengashining mustaqil aʼzosi Tatyana Dogan ham lavozimidan ozod etilgan.

Sentpeteri bungacha Ipoteka-bankda boshqaruv raisi oʻrinbosari, strategiya va moliya bloki rahbari hamda moliyaviy direktor sifatida faoliyat yuritgan. U bankka 2023 yil iyul oyida qoʻshilgan va 2023 yil sentabrdan bank transformatsiya dasturi uchun masʼul boʻlib kelgan.

Adam Sentpeteri OTP Group tizimida ham uzoq yillik tajribaga ega. U 2005 yilda OTP Groupga makroiqtisodiy tahlilchi sifatida qoʻshilgan, keyinchalik chakana biznes, controlling va strategiya yoʻnalishlarida rahbarlik lavozimlarida ishlagan.

Qarorga koʻra, Sentpeteri yangi boshqaruv raisi saylanib, belgilangan tartibda tayinlangunga qadar bank boshqaruviga vaqtincha rahbarlik qiladi.

18 may kuni bankning rasmiy saytida Sandro Rtveladze 1 iyuldan boshlab Ipoteka-bank boshqaruv raisi lavozimini tark etishi xabar qilingan edi.