2025 yilda valyuta kursi barqarorlashuvi fonida soʻmdagi depozitlar hajmi 44 foizga oshdi

2025 yil Oʻzbekiston milliy valyutasi soʻm uchun ijobiy yil sifatida esda qoldi. Yil davomida valyuta bozori nisbatan barqaror ishladi, almashuv kursi mustahkamlandi va bu omil bank tizimidagi koʻrsatkichlariga ham sezilarli taʼsir koʻrsatdi.

2025 yilda dollar kursi 6,8–6,9 foizga mustahkamlandi. Oʻrtacha yillik almashuv kursi 12 575 soʻmni tashkil etdi. 

Yil davomida dollar kursining eng yuqori koʻrsatkichi 13 004 soʻmni (oʻrtacha kursdan 5,5 foiz yuqori), eng past koʻrsatkichi esa 11 881 soʻm (oʻrtacha kursdan 3,4 foiz past) darajasida qayd etildi. Kunlik tebranuvchanlik ikki barobarga oshganiga qaramay, umumiy trend milliy valyuta pozitsiyasining kuchayganini koʻrsatdi.

Markaziy bank qayd etishicha, almashuv kursining mustahkamlanishi milliy valyutaga boʻlgan ishonchni sezilarli darajada oshirdi. 

Bu, avvalo, bank tizimidagi depozitlar tarkibida namoyon boʻldi. 2025 yilda milliy valyutadagi depozitlar hajmi 44 foizga oshib, 240 trillion soʻmga yetdi. 

Inflyatsion kutilmalar ham pasayish trendiga oʻtdi. Aholining inflyatsion kutilmalari yil boshidagi 14,4 foizdan 11,5 foizgacha qisqardi. Tadbirkorlar orasida bu koʻrsatkich 13,9 foizdan 11,1 foizgacha tushdi. Kutilmalar shakllanishida valyuta kursi omilining taʼsiri ikki barobarga kamaygan. 

Bank tizimida dollarlashuv darajasining pasayishi ham jarayonning mantiqiy davomi boʻldi. Kreditlar boʻyicha dollarlashuv 41 foizdan 38 foizgacha, depozitlar boʻyicha esa 26 foizdan 22 foizgacha kamaydi. 

Valyuta barqarorligi tashqi qarzga xizmat koʻrsatish xarajatlariga ham ijobiy taʼsir koʻrsatdi. Yil davomida davlat va korporativ tashqi qarz boʻyicha xarajatlar oʻrtacha 6–7 foizgacha qisqargan.

Shuningdek, mijozlar tomonidan banklarga sotilgan valyuta hajmi 35 foizga oshib, 47 milliard dollarga yetdi.