Ўзбекистон Марказий банки валюта бозоридаги интервенциялар қандай тамойиллар асосида амалга оширилишини очиқловчи стратегияни эълон қилишга тайёрланмоқда. Бу ҳақда Марказий банк раиси Тимур Ишметов Silk Road Finance & Technology Forum доирасидаги FT Live панель сессиясида маълум қилди.

Унинг айтишича, Ўзбекистон алмашув курсини мослашувчан ва бозор тамойилларига асосланган ҳолда сақлаб қолишни давом эттиради. Халқаро валюта жамғармаси ҳам яқинда мамлакатнинг курс режимини “флоатинг”, яъни сузувчи курс сифатида қайта таснифлаган.

Шу билан бирга, Марказий банкнинг валюта бозоридаги иштироки, айниқса регуляторнинг катта ҳажмда олтин харид қилиши фонида, бозорда саволлар туғдираётганини Ишметов тан олди.

Марказий банк мамлакат ичида қазиб олинган олтинни сотиб олганда иқтисодиётга сўм чиқаради. Натижада юзага келадиган қўшимча миллий валюта ликвидлигини нейтраллаштириш учун регулятор валюта бозорида хорижий валюта сотади.

Ишметовнинг қайд этишича, тайёрланаётган стратегия айнан шу механизмни бозорга аниқроқ тушунтириб беради.

“Ҳа, биз бозорга интервенция қиламиз, бироқ бу муайян алмашув курсини қўллаб-қувватлаш учун эмас. Бу олтин харид қилиш операцияларимиз билан боғлиқ”, деди у.

Марказий банк стратегияни якунлаб, жамоатчиликка эълон қилишни режалаштирмоқда. Ҳозирча ҳужжат қачон чоп этилиши айтилмаган.

Регулятор умуман коммуникация ва шаффофликни оширишни кейинги босқичдаги устувор вазифаларидан бири сифатида белгилаган. Ишметовнинг айтишича, Халқаро валюта жамғармаси июль ойида Ўзбекистон Марказий банкининг Central Bank Transparency Code бўйича баҳолашини якунлаган ва унинг натижалари ҳам эълон қилиниши кутилмоқда.

Бундан ташқари, капитал ҳисобини босқичма-босқич либераллаштириш бўйича ислоҳотлар кетма-кетлиги ҳам якунланиб, очиқланиши режалаштирилган.

Марказий банк валюта интервенцияси стратегиясини эълон қилади