Технологик стартаплар оламида муваффақият ҳикоялари кўпинча кутилмаган воқеалар билан бошланади. Баъзан битта қарор ёки оддий бир ҳолат инсон ҳаётини бутунлай ўзгартириши мумкин. Райан Грейвс учун бундай бурилиш 2010-йилда юз берди. У оддий бир Twitter (ҳозирги X) пости орқали Uber компаниясининг биринчи миллиардерига айланди.

Барчасини бошлаган Twitter пости

2010-йил бошларида технологик стартаплар жадал ривожланаётган, Сан-Франциско эса бу инқилобнинг марказига айланган эди. Айни шу даврда, Uber компаниясининг ҳаммуассиси Трэвис Каланик бизнесни ривожлантирадиган инсонни қидира бошлади. У Twitter’да қуйидаги оддий, аммо мазмунли эълонни қолдирди:

“Сан-Францискода бизнесни ривожлантирадиган hustler керак. Катта улуш, катта орзу.”

Кўпчилик учун бу хабар оддий ёки ҳатто тушунарсиз туюлган бўлиши мумкин. Аммо Шарқий соҳилдаги General Electric (GE) компаниясида ишлаётган, стартапларга қизиқиши кучли бўлган Райан Грейвс учун бу имконият катта бурилиш бўлди. У твитга қисқа, аммо ишончили жавоб ёзди:

“Маслаҳат: менга email юборинг :)”

Ушбу қисқа жавоб Каланик эътиборини тортди. Бир неча соат ичида Грейвс унга резюмесини юборди ва Uber сафарига қўшилиш истагини билдирди. Бу воқеа ҳар иккала инсон ҳаётида янги даврни бошлаб берди.

Uber’га ишга кириш

Кўп ўтмай улар шахсан учрашишди ва дарҳол бир-бирини тушунишди. Грейвс оддий номзод эмасди — у бизнесни ривожлантириш тамойилларини яхши биладиган, янгиликлардан илҳом оладиган, иштиёқли инсон эди.

Ўша пайтда Uber ҳали кичик лойиҳа эди. Тугмани босиб, машина чақириш ғояси инновацион бўлса-да, кенг оммага таниш эмасди. Грейвс эса Каланикнинг транспорт соҳасини ўзгартириш ҳақидаги орзусидан илҳомланди. Uber айнан шундай ғайратли одамларга муҳтож эди — Грейвс эса улардан бири бўлди.

Грейвс компаниянинг биринчи расмий ходими сифатида иш бошлади. У наfaқат бош менежер, балки Uber’ни дунёга танитиш учун жонини беришга тайёр инсон эди.

Биринчи ходимдан биринчи CEO'гача

Дастлабки кунларда Грейвс деярли барча ишлар билан шахсан шуғулланарди. У Uber’нинг биринчи ходими, ҳатто қисқа муддатда биринчи бош директори (CEO) ҳам бўлган. Сан-Францискода Uber операцияларини йўлга қўйди, янги ҳайдовчилар ва мижозларни жалб қилди.

Uber тез ўсиб, янги чақириқлар олдига келганда, Каланик бош директорликни ўз қўлига олди. Лекин Грейвс компанияни тарк этмади. У Глобал операциялар раҳбари лавозимига ўтди ва Uber’ни Сан-Францискодан бутун дунёга олиб чиқишда асосий роль ўйнади.

Грейвснинг ҳикоясининг энг қизиқарли томони — у наfaқат дастлабки ходим, балки Uber’нинг келажагига ишониб, акциялар олган одамлардан бири эди. Uber асосчилари муваффақиятни улашиш учун биринчи ходимларга катта акциялар улушини берган эди.

Вақт ўтган сари Uber ўсди, Грейвснинг акциялари ҳам қадрлана бошлади. 2019-йилда Uber акциялари оммавий савдога чиққанида (IPO), Грейвснинг улуши 1 миллиард доллардан ошди. Шу тариқа у Uber’нинг биринчи миллиардерига айланди.

Forbes миллиардерлар рейтингига кўра, Райаннинг бойлиги ҳозирда 1,43 миллиард долларни ташкил қилади.

Қандай қилиб битта Twitter пости Райан Грейвсни миллиардерга айлантирди?