Адлия вазирлигининг Интеллектуал мулк департаменти томонидан ўтказилган мониторинг натижаларига кўра, Ўзбекистондаги айрим йирик онлайн савдо платформаларида контрафакт маҳсулотлар сотилаётгани аниқланди.

Интеллектуал мулк ҳуқуқларини ҳимоя қилиш, ноқонуний маҳсулотларнинг эркин муомалага чиқишининг олдини олиш ҳамда ҳуқуқ эгаларининг қонуний манфаатларини тиклаш мақсадида республика ҳудудида фаолият юритаётган Uzum Market, Olcha ва Glotr электрон савдо платформалари фаолияти ўрганилди.

Мониторинг натижаларига кўра:

Uzum Market платформасида 220 дан ортиқ,
Olcha ва Glotr платформаларида эса 50 га яқин контрафакт маҳсулотлар савдога таклиф этилаётгани аниқланган.

Ноқонуний маҳсулотлар, асосан, кийим-кечак, косметика воситалари ва маиший техника туркумларида учрамоқда. Улар машҳур халқаро брендлар — Puma, Lacoste, Adidas, Chanel, Eclat, Gucci, Samsung, Bosch товар белгилари остида ишлаб чиқарилган ва сотувга қўйилган.

Аниқланган ҳолатлар бўйича ҳуқуқ эгаларининг мурожаатлари асосида “Узум Market” платформасидан бир қатор контрафакт маҳсулотлар савдоси тўхтатилган ва улар тизимдан олиб ташланган.

Шунингдек, қолган аниқланган ҳолатлар юзасидан ҳам тегишли ҳуқуқ эгаларига расмий равишда хабарномалар юборилган бўлиб, уларнинг муносабатларига асосан қонуний чоралар кўрилиши белгиланган.

Адлия вазирлиги тадбиркорлик субъектлари ва фуқаролардан интеллектуал мулкка оид ҳуқуқлари бузилган тақдирда 1008 қисқа рақамли ишонч телефони ёки info@adliya.uz электрон почта манзили орқали мурожаат қилишларини сўрайди.

Uzum Market, Olcha ва Glotr маркетплейсларида қалбаки маҳсулотлар сотилаётгани аниқланди