Ўзбекистондаги 32 та лицензияланган тўлов ташкилоти 2026 йилнинг биринчи ярмини жами 735,2 млрд сўм соф фойда билан якунлади. Бу 2025 йилнинг мос давридаги 993,6 млрд сўмга нисбатан 258,3 млрд сўм ёки 26 фоизга кам.

Ҳисоб-китобга тўлов тизими операторлари — UZCARD, HUMO ва Payfintech киритилмади. Марказий банк реестрида тўлов ташкилоти сифатида кўрсатилган ЎзРТХБ ҳам асосий фаолияти товар-хомашё биржаси бўлгани сабабли таҳлилдан чиқарилди.

Пасайишнинг асосий сабаби Solutions Lab (Uzum Nasiya) натижасининг 311,9 млрд сўмлик фойдадан 267,6 млрд сўмлик зарарга ўтиши бўлди. Paynet эса HUMO’дан олинган дивиденд ҳисобига 615,5 млрд сўм билан бозордаги энг юқори натижани қайд этди.

Фойда олганлар камайди, зарар кескин ошди

Ҳисобот тақдим этган 32 та ташкилотнинг 16 таси фойда, 16 таси зарар қайд этди. Таққослаш учун, 2025 йилнинг биринчи ярмида 20 та ташкилот фойда, 10 таси зарар билан ишлаган, яна 2 та ташкилот бўйича таққосланадиган маълумот мавжуд эмас.

Фойда олган ташкилотларнинг умумий натижаси 2,2 фоизга ошиб, қарийб 1 трлн 34,9 млрд сўмга етган.

Бироқ зарар кўрган ташкилотларнинг умумий зарари 19,5 млрд сўмдан 299,6 млрд сўмга ёки 15,4 бараварга ошган. Натижада бозорнинг якуний соф фойдаси 258,3 млрд сўмга камайган.

Шу билан бирга, бозор юқори даражада концентрациялашган. Paynet, Payme ва Click фойда олган тўлов ташкилотлари умумий натижасининг 93,9 фоизини таъминлаган.

Paynet фойдасининг ярмидан кўпи HUMO дивидендига тўғри келди

Paynet АЖ 2026 йилнинг биринчи ярмини 615,5 млрд сўм соф фойда билан якунлади. Бу ўтган йилнинг шу давридаги 201 млрд сўмга нисбатан 414,5 млрд сўм ёки 3,1 баравар кўп.

Компаниянинг соф тушуми 51 фоизга ошиб, 1 трлн 142,2 млрд сўмга етган. Асосий фаолиятдан олинган фойда эса 54,7 фоизга кўпайиб, 366 млрд сўмни ташкил қилган.

Бироқ якуний фойданинг кескин ўсишида Paynet’нинг бевосита тўлов хизматларидан ташқари даромади ҳам муҳим роль ўйнаган. Компания ўзига тегишли HUMO тўлов тизимидан 321,1 млрд сўм дивиденд олган. Бу ярим йиллик соф фойданинг 52,2 фоизига тенг.

Ушбу дивидендни соф фойдадан шартли равишда чиқариб ташлаганда, 294,4 млрд сўм қолади. Бу расмий «тузатилган фойда» кўрсаткичи эмас, аммо Paynet натижасини бошқа тўлов компаниялари билан аниқроқ таққослаш имконини беради.

Дивиденд ҳисобга олинмаган тақдирда ҳам Paynet фойдаси бир йил ичида 46,5 фоизга ошган ҳамда Payme натижасидан 43 фоиз, Click’никидан эса қарийб икки баравар юқори бўлган.

O‘zbekistondagi to‘lov tashkilotlarining 2025 va 2026-yillar birinchi yarim yilligidagi moliyaviy natijalari

Payme Click билан фарқни кенгайтирди

Payme бренди остида ишлайдиган PAYME АЖ ярим йилда 205,9 млрд сўм соф фойда олди. Бу 2025 йилнинг мос давридаги 166,6 млрд сўмга нисбатан 39,4 млрд сўм ёки 23,6 фоизга кўп.

Компаниянинг соф тушуми 50,6 фоизга ошиб, 492,7 млрд сўмга етган, бироқ хизматлар таннархи 84,2 фоизга кўпайиб 159,4 млрд сўмни ташкил қилган, шунингдек фойда солиғи харажатлари ҳам 2,7 млрд сўмдан 19,7 млрд сўмгача ошган.

Натижада Payme’нинг соф фойда маржаси 50,9 фоиздан 41,8 фоизгача пасайган. Яъни компания даромадини кескин оширган бўлса-да, ҳар 100 сўмлик тушумдан қолаётган соф фойда камайган.

CLICK АЖ эса биринчи ярим йилликни 150 млрд сўм соф фойда билан якунлади. Бу ўтган йилги 154,7 млрд сўмдан 4,7 млрд сўм ёки 3 фоизга кам.

Click тушуми 23,8 фоизга ошиб, 437,6 млрд сўмга етган. Бироқ харажатлар даромаддан тезроқ, яъни 40,9 фоизга кўпайиб, 254,4 млрд сўмни ташкил қилган.

Натижада Click’нинг соф фойда маржаси 43,8 фоиздан 34,3 фоизгача тушган. Payme ва Click ўртасидаги фойда фарқи эса бир йил ичида 11,9 млрд сўмдан 55,9 млрд сўмгача кенгайган.

Uzum Nasiya фойдадан катта зарарга ўтди

Энг катта салбий ўзгариш Uzum Nasiya бренди остида ишлайдиган Solutions Lab АЖда кузатилди. Компания 2025 йилнинг биринчи ярмидаги 311,9 млрд сўмлик фойда ўрнига 267,6 млрд сўм зарар қайд этди.

Компаниянинг соф тушуми 1 трлн 948,1 млрд сўмдан 392,6 млрд сўмга, яъни қарийб 80 фоизга камайган. Натижада асосий фаолият натижаси 287,8 млрд сўмлик фойдадан 310 млрд сўмлик зарарга ўтган.

Alif фойдасини икки баравардан кўпроққа оширди

Alif.mobi бренди остида фаолият юритадиган ALIF TECH АЖ соф фойдасини 9,3 млрд сўмдан 21,2 млрд сўмга етказган. Бир йиллик ўсиш 11,9 млрд сўм ёки 2,3 бараварни ташкил қилган.

Zaytun Tech ҳам 25,3 млрд сўм билан йирик компаниялардан кейинги энг юқори натижалардан бирини қайд этди. Бироқ унинг фойдаси ўтган йилги 99,7 млрд сўмга нисбатан 74,6 фоизга камайган.

Smart Marketplace фойдасини 606,4 млн сўмдан 2,2 млрд сўмга етказган.

Айни пайтда Rahmat бренди асосида ишловчи Multicard Payment АЖ фойдаси 5,4 млрд сўмдан 1,4 млрд сўмгача қисқарган. Tezpay’да пасайиш янада кескин бўлиб, фойда 27,3 млрд сўмдан 786,3 млн сўмгача тушган.

Бир нечта компания зарардан фойдага чиққан. IWON бренди остида ишлайдиган Choyxona АЖ 3,5 млрд сўмлик зарардан 2,2 млрд сўмлик фойдага ўтган.

Шунингдек, EMIT-Solution 551,8 млн сўмлик зарардан 2,2 млрд сўмлик фойдага, MARTA брендини бошқарувчи Mayasoft эса 362,8 млн сўмлик зарардан 1,1 млрд сўмлик фойдага чиққан.

OSON ва ATMOS зарар билан ишлади

OSON бренди ортидаги BRIO GROUP АЖ ярим йилликда 2,4 млрд сўм зарар қайд этди.

ATMOS’ни бошқарувчи National Innovative Payment Technologies АЖнинг зарари 1,9 млрд сўмдан 5,4 млрд сўмгача ошган.

Infinity Pay бренди остида ишлайдиган Quick Payments Solution бир йил аввалги 4,3 млрд сўмлик фойда ўрнига 4,8 млрд сўм зарар кўрган. A-pay 688,6 млн сўмлик фойдадан 5,1 млрд сўмлик зарарга, Milliy Pay эса 10,2 млрд сўмлик фойдадан 1,2 млрд сўмлик зарарга ўтган.

GlobalPay ҳам 7,7 млрд сўмлик фойда ўрнига 890,6 млн сўм зарар қайд этган. Paylov 1,1 млрд сўм, Open 1,4 млрд сўм, Oxus Pay 1,5 млрд сўм ва Freedom Pay 4,5 млрд сўм зарар билан ишлаган.

Шуни ҳисобга олиш керакки, рақамлар лицензияга эга юридик шахсларнинг умумий молиявий натижасини кўрсатади. Улар фақат мобил илова ёки тўлов хизматларидан олинган фойдани англатмайди.

Масалан, Paynet натижасига HUMO’дан олинган дивиденд, Solutions Lab кўрсаткичларига Uzum Nasiya экотизими хизматлари ҳам киради. Шу сабабли ушбу маълумотлар компанияларнинг умумий молиявий ҳолатини таққослаш имконини берса-да, тўлов хизматларининг ўз рентабеллигини тўлиқ очиб бермайди.

Ўзбекистондаги тўлов ташкилотлари ярим йилда қанча соф фойда олди?

Alif финтех компанияси Ўзбекистонда банк лицензиясини олишга тайёрланмоқда