Миллий статистика қўмитаси маълумотларига кўра, жорий йилнинг дастлабки беш ойида Ўзбекистоннинг номонетар олтин экспорти 1 млрд 503,8 млн долларни ташкил этди. 2025 йилнинг шу даврида мамлакат 6 млрд 492,1 млн долларлик олтин экспорт қилган эди.

Шу тариқа, олтин экспорти бир йилда 4 млрд 988,3 млн долларга ёки 76,8 фоизга қисқарди. Унинг мамлакат умумий экспортидаги улуши ҳам 43,4 фоиздан 11,9 фоизга тушди.

Олтин экспорти ойлар кесимида

Расмий ҳисоботларда келтирилган жамланма кўрсаткичлар ўртасидаги фарқдан келиб чиқиб, 2026 йилда олтин экспорти ойлар бўйича қуйидагича шаклланган:

январь — 0 доллар;
февраль — 0 доллар;
март — 30 млн доллар;
апрель — 1 млрд 473,8 млн доллар;
май — 0 доллар.

Яъни январь, февраль ва май ойларида расмий статистикада олтин экспорти қайд этилмаган. Беш ойлик экспортнинг 98 фоизи апрель ойининг ўзига тўғри келган. Январь–февралда олтин экспорти 0 доллар бўлган, январь–мартда 30 млн долларга, январь–апрелда эса 1 млрд 503,8 млн долларга етган. Май ойида жамланма кўрсаткич ўзгармаган.

Ўтган йили олтин ҳар ой экспорт қилинган

Таққослаш учун, 2025 йилнинг дастлабки беш ойида олтин экспорти қуйидагича бўлган:

январь — 0 доллар;
февраль — 1 млрд 730,5 млн доллар;
март — 1 млрд 840,2 млн доллар;
апрель — 1 млрд 910,5 млн доллар;
май — 1 млрд 10,9 млн доллар.

2025 йилда февраль–май ойларининг ҳар бирида камида 1 млрд долларлик олтин экспорт қилинган. 2026 йилда эса йирик ҳажмдаги сотув фақат апрель ойида кузатилди. Ойлик рақамлар жамланма ҳисоботлардаги кўрсаткичларни бир-биридан айириш орқали ҳисобланди.

Умумий экспорт ҳам камайди

Олтин сотувининг қисқариши Ўзбекистон умумий экспортига ҳам сезиларли таъсир кўрсатди. Январь–май ойларида жами экспорт 12 млрд 638,1 млн долларни ташкил этиб, ўтган йилга нисбатан 15,5 фоизга камайди.

Бироқ олтин ҳисобга олинмаган товарлар экспорти 6,5 млрд долларга етиб, бир йилда 29,4 фоизга ошди. Бу умумий экспортдаги пасайиш асосан олтин сотувлари камайиши билан боғлиқ эканини кўрсатади.

Ўзбекистоннинг олтин экспорти қарийб 77 фоизга камайди