Paramount Warner Bros. Discovery’ни сотиб олиш учун “душманона” (hostile) таклиф билан чиққанини эълон қилди. Бу қарор компаниянинг Netflix билан йирик савдо бўйича курашда мағлуб бўлганидан кейин юзага келди.

Paramount медиа-конгломератнинг ҳар бир акцияси учун 30 доллар таклиф қилмоқда. Битим умумий қиймати 108 миллиард доллардан ошиши айтилмоқда. Warner Bros. Discovery таркибига Warner Bros. киностудияси, HBO кабель канали, HBO Max стриминг хизмати ҳамда бир қатор кабель телевидение брендлари киради.

Ўтган ҳафта Netflix Warner Bros. Discovery’нинг студия ва стриминг активларининг катта қисмини ҳар бир акция учун 27,75 долларга сотиб олишга рози бўлганди. Netflix’нинг таклифи 82,7 миллиард долларга баҳоланган бўлиб, унга Warner’га тегишли кабель каналлари кирмаган.

Paramount ўз баёнотида Warner Bros. акциядорларига “Netflix битимига нисбатан устун муқобил” тақдим этаётгани, Netflix билан келишув эса компанияни мураккаб тартибга солувчи жараёнларга тортишини маълум қилди. АҚШ қонунчилигига кўра, Warner Bros. Discovery акциядорлари таклифни кўриб чиқишга мажбур.

“WBD акциядорлари бизнинг устун, тўлиқ нақд пулдан иборат таклифимизни кўриб чиқишга ҳақли”, деди Paramount бош директори Девид Эллисон. “Бизнинг оммавий таклифимиз директорлар кенгашига берилган махфий таклиф билан бир хил шартларда, бироқ аниқроқ ва тезроқ якунланадиган жараённи таклиф этади”.

Эллисон жорий йилда Paramount’ни 8 миллиард долларга сотиб олган ва студия активларини ўзининг Skydance компаниясига бирлаштирган эди. У — технология магнати, президент Доналд Трампга яқин миллиардер Ларри Эллисоннинг ўғли.

Netflix таклифидан фарқли равишда, Paramount’нинг битими тўлиқ нақд пулдан иборат бўлиб, Эллисонлар оиласининг бойлиги билан таъминланади. Компания шунингдек Bank of America, Citi ва Apollo Global Management томонидан 54 миллиард долларлик молиялаштириш мажбурияти мавжудлигини билдирди. Битимнинг умумий қиймати 108 миллиард доллардан ошади.

Агар Paramount Netflix’ни ортда қолдира олса, йилига “30+” кинони театр релизи билан чиқаришни ваъда қилмоқда.

“Биз бошлаган ишни охирига етказиш учун бу ердамиз”, деди Эллисон CNBC’га берган интервьюсида. “Биринчи ўриндаги стримерни учинчи ўриндаги стример билан бирлаштириш — 400 миллиондан ортиқ обуначи билан мислсиз бозор кучига эга компания яратади. Кейинги йирик рақиб — Disney, у деярли 200 миллион обуначига эга. Бу Голливуд учун жуда ёмон ҳолат”.

“Бизда устун таклиф бор ва уни бевосита акциядорларга тақдим этяпмиз. Улар буни маъқуллашига ишонаман”, дея қўшимча қилди у.

7 декабрь куни Трамп Netflix’нинг Warner Bros.’ни сотиб олишини потенциал антимонополия “муаммоси” деб атади. У, шунингдек, ушбу битимни тасдиқлаш жараёнида “иштирок этишини” билдирди. Трамп Netflix ҳаммуассиси Тед Сарандос яқинда мазкур масалани муҳокама қилиш учун Овал кабинетга келганини, бироқ ҳеч қандай ваъда берилмаганини ҳам айтди.

Paramount Warner Bros.’ни сотиб олиш учун $108 млрдлик таклиф билан чиқди