Доналд Трампнинг мемкоинини сотиб олган 813 000 дан ортиқ крипто ҳамён эгалари жами $2 млрд йўқотди. Шу билан бирга, Trump Organization ва унинг ҳамкорлари савдо тўловларидан 100 миллион доллар фойда кўрди.

Мавзуга доир: Доналд Трамп ва унинг рафиқаси Мелания Трамп ўзининг иккинчи президентлик муддати олдидан $TRUMP ва $MELANIA номли мемкоинларни ишга туширди.

17 январда ишга туширилган $TRUMP дастлаб кескин қимматлашди ва 19 январда қарийб 75 долларга етиб, 14,75 миллиард долларлик бозор қийматига эга бўлди. Аммо бир неча кундан кейин унинг нархи сезиларли даражада пасайиб кетди.

Бугунги кунда мемкоин крипто-биржаларда 16 доллардан бироз юқорироқ нархда савдо қилинмоқда ва унинг бозор капиталлашуви эса 3,72 миллиард долларни ташкил қилмоқда. Бу эса крипто-актив энг юқори қийматидаги бозорлашувининг 4/3 қисмини йўқотганини билдиради.

Ишга туширилганидан атиги уч ҳафта ўтиб, Доналд Трампнинг мемкоини ғолибларга қараганда кўпроқ йўқотганларни пайдо қилди. Ҳар бир савдо тўлови орқали $TRUMP яратувчилари 1 доллар ишлаб топган бўлса, инвесторлар 20 доллар йўқотган.

Chainalysis криптовалюта компанияси томонидан ўтказилган таҳлилга кўра, $TRUMP токенини сотиб олиб ушлаб турган ёки зарарга сотган жами 813 294 ҳамён 19 кун ичида 2 миллиард доллар зарар кўрган.

Merkle Science ва Chainalysis таҳлилчилари ушбу савдо Trump Organization ва бошқа манфаатдор томонларга 100 миллион доллар савдо тўловларини олиб келганини ҳисоблаб чиқди. Бироқ, бу маблағнинг катта қисми ҳали нақдга айлантирилмаган.

Доналд Трамп оилавий кўчмас мулк, кўнгилочар бизнес ва эндиликда крипто-активларини бошқарадиган хусусий ҳолдинг компанияси эгаси бўлса-да, иккинчи президентлик муддати олдидан корпорациянинг раҳбарлигини фарзандларига топширган. У илгари ўз бизнесидан воз кечиш ёки уни кўр-кўрона ишончли бошқарувга ўтказишдан бош тортган эди.

$TRUMP мемкоини ортидан 800 мингдан кўпроқ фойдаланувчи $2 миллиард йўқотди