Йилнинг иккинчи ярмида Марказий банк асосий ставкани 13 фоизгача пасайтириши мумкин — ЕТБ

Евроосиё тараққиёт банкининг (ЕТБ) 2026 йил март ойида эълон қилинган макроиқтисодий шарҳига кўра, Ўзбекистон Марказий банки йилнинг иккинчи ярмида асосий ставкани пасайтириши эҳтимоли юқори.

Ташкилот инфляциянинг секинлашуви, миллий валютанинг мустаҳкамланиши ҳамда иқтисодий ўсиш суръатларини ушбу прогнознинг асосий омиллари сифатида келтирган.

Асосий ставка ўзгаришсиз қолмоқда

Марказий банк 2025 йил март ойидан буён асосий ставкани 14 фоиз даражасида сақлаб келмоқда. Жумладан, 2026 йил 18 март куни бўлиб ўтган Марказий банк бошқаруви йиғилишида ҳам ставка ўзгаришсиз қолдирилди. 

Бироқ инфляциянинг 5 фоизлик мақсадли кўрсаткич томон секинлашиб бораётгани фонида 2026 йилнинг иккинчи ярмида ставкани тахминан 13 фоизгача пасайтириш учун макроиқтисодий шароит шаклланиши мумкин.

Инфляция секинлашмоқда

Қаттиқ пул-кредит сиёсати ўз натижасини бермоқда. 2026 йил январь ҳолатига кўра инфляция 7,2 фоизни ташкил этди ва бу сўнгги тўққиз йилдаги энг паст кўрсаткичлардан бири ҳисобланади. Мутахассислар йил якунига қадар инфляция даражаси 6,7 фоизгача пасайишини прогноз қилмоқда.

Миллий валюта мустаҳкамланмоқда

2025 йилда Ўзбекистон сўми тарихда илк бор АҚШ долларига нисбатан номинал қийматда 6,8 фоизга мустаҳкамланди. Бунга олтин экспортидан тушган рекорд даражадаги даромадлар, пул ўтказмалари ҳажмининг ортиши ҳамда тўғридан-тўғри хорижий инвестициялар оқимининг кўпайиши муҳим омил бўлди.

Иқтисодий ўсиш юқори суръатларда

2025 йилда Ўзбекистон иқтисодиёти 7,7 фоизга ўсди. Ички талабнинг ошиши, хусусан чакана савдо, хизмат кўрсатиш ва қурилиш соҳаларидаги фаоллик иқтисодий ўсишнинг асосий драйверлари бўлди. 2026 йилда эса ЯИМ ўсиши бироз барқарорлашиб, 6,7 фоиз атрофида бўлиши кутилмоқда.

ЕТБ таҳлилига кўра, инфляциянинг жиловланиши ва миллий валютанинг барқарорлиги Марказий банкка иқтисодий фаолликни қўллаб-қувватлаш мақсадида фоиз ставкаларини босқичма-босқич пасайтириш имконини бериши мумкин.