Янги “Ўргимчак одам” фильми илк дам олиш кунида $927 млн йиғди

Sony ва Marvel’нинг “Ўргимчак одам: Янги кун” фильми жаҳон прокатида $927 млнлик дебют қайд этди. Шундан $355 млн АҚШ ва Канада, $572 млн эса бошқа халқаро бозорлардаги намойишлардан тушган. Бу кино тарихидаги иккинчи энг йирик глобал старт бўлди.

Дастлабки ҳисоб-китобларга кўра, фильм 31 июлдан 2 августгача АҚШ ва Канададаги 4 487 та кинотеатрда $355 млн ишлаб топган. Ҳар бир кинотеатрга ўртача $79,1 мингдан тушум тўғри келган.

Бу кўрсаткич 2019 йилда $357,1 млнлик дебют қайд этган “Қасоскорлар: Интиҳо” натижасидан бор-йўғи $2,1 млн ёки 0,6 фоизга кам. Глобал бозорда ҳам “Ўргимчак одам: Янги кун” фақат илк дам олиш кунида $1,22 млрд йиғган “Қасоскорлар: Интиҳо”дан ортда қолмоқда.

Янги фильм Tom Holland иштирокидаги олдинги “Ўргимчак одам: Уйга йўл йўқ” натижасини сезиларли даражада яхшилади. 2021 йилда чиқарилган фильм АҚШ ва Канадада $260,1 млн, бутун дунёда эса қарийб $600 млнлик старт қайд этган эди. Шу тариқа, “Ўргимчак одам: Янги кун”нинг ички бозордаги дебюти 36,5 фоизга, глобал тушуми эса қарийб 54,5 фоизга юқори бўлди.

Умумий тушумнинг 61,7 фоизи халқаро бозорларга тўғри келган. Хитойнинг ўзида фильм $121 млн йиғди — бу хорижий тушумнинг қарийб бешдан бир қисми дегани.

Фильм атиги бир неча кун ичида 2026 йилнинг энг кўп даромад қилган фильмлари орасида тўртинчи ўринга чиқди. Ҳозирча ундан “Ўйинчоқлар тарихи 5” — $1,07 млрд, “Майкл” — $1,02 млрд ва “Супер Марио галактикаси” — $1,01 млрд натижа билан олдинда турибди. “Ўргимчак одам: Янги кун” учинчи ўринга чиқиши учун яна қарийб $84,5 млн йиғиши керак.

Шу билан бирга, $927 млнлик рақам фильмнинг якуний натижаси эмас. “Ўргимчак одам: Уйга йўл йўқ” ўз прокати давомида жами $1,92 млрд ишлаб топган эди. Янги фильмнинг узоқ муддатли натижаси эса кейинги ҳафталардаги тушумнинг қанчалик кескин пасайишига боғлиқ бўлади.

Маълумот учун, фильм Ўзбекистонда 6 августдан бошлаб намойиш этилади. Уни кинотеатрларда ўзбек, инглиз ва рус тилларида томоша қилиш мумкин.