UZCARD’нинг ярим йиллик соф фойдаси 52,7 фоизга ошиб, 621,6 млрд сўмни ташкил этди
Банк тизими билан таққослаганда, Ўзбекистондаги 36 та банкдан фақатгина 3 таси ярим йилликни UZCARD’дан юқорироқ фойда билан якунлаган.
UZCARD тўлов тизими 2025 йилнинг биринчи ярим йиллигига оид молиявий ҳисоботини тақдим қилди. Унга кўра, компания соф фойдасида сезиларли ўсиш кузатилган.
UZCARD тўлов тизими 2025 йил январь–июнь ойларига оид молиявий ҳисоботини эълон қилди. Унга кўра, компания соф фойдаси сезиларли даражада ошган.
Аудитланмаган МҲХС маълумотларига кўра, UZCARD’нинг 2025 йилнинг биринчи ярмидаги соф фойдаси 621,6 млрд сўмни ташкил этди. Бу кўрсаткич 2024 йилнинг мос даврига нисбатан 52,7% юқори. Ўтган йилнинг шу даврида компания 406,9 млрд сўм соф фойда қайд этган эди.
Эътиборли жиҳати шундаки, UZCARDʼнинг соф фойдаси молиявий сектордаги кўплаб йирик банкларникидан ҳам юқори бўлди.
Фақатгина учта банк — Ўзбекистон Миллий банки, Ўзсаноатқурилишбанк ва Ҳамкорбанк соф фойда бўйича UZCARDʼдан юқори натижа кўрсатган.
Ҳисобот даврида соф тушум 68,7 фоизга ошиб, 953,3 млрд сўмни ташкил этди, операцион фойда эса 59,7 фоизга кўтарилиб, 636,4 млрд сўмга етди.
Шу билан бирга, фойда солиғи бўйича харажатлар 3,3 млрд сўмдан 3,1 млрд сўмга қисқарган.
Компаниянинг жами активлари эса 35,6 фоизга ошиб, 997,3 млрд сўмни ташкил қилди.
Kap Depo маълумотларига кўра, 2025 йилнинг биринчи ярим йиллигида UZCARD соф фойданинг бир қисмини дивиденд сифатида тақсимлади. Бу мақсад учун 300 млрд сўм йўналтирилиб, ҳар бир акция учун 6 000,14 сўм дивиденд тўланган.
