Uzbekistan Airways’дан UzAuto Motors’гача: 2025 йилда қайси компаниялар энг кўп солиқ ва божхона имтиёзларидан фойдаланди?

Коррупцияга қарши курашиш агентлиги 2025 йилда солиқ ва божхона имтиёзларидан энг кўп фойдаланган ташкилотлар рўйхатини эълон қилди. Маълумотлар йирик фискал имтиёзлар асосан энергетика, транспорт-логистика, автомобилсозлик, газ-кимё ва саноат-импорт лойиҳалари атрофида жамланганини кўрсатмоқда.

Солиқ имтиёзлари

2025 йилда солиқ имтиёзларидан фойдаланган ташкилотлар рўйхатида биринчи ўринни “Uzbekistan GTL” МЧЖ эгаллаган. Корхона йил давомида 2,8 трлн сўмлик солиқ имтиёзидан фойдаланган. Кейинги ўринларда “Узбекистан Airways” АЖ — 2,4 трлн сўм, “Ўзбекнефтгаз” АЖ эса 1,7 трлн сўм билан қайд этилган.

Топ-15 рўйхатдаги солиқ имтиёзларининг умумий ҳажми қарийб 14,8 трлн сўмни ташкил этади. Шундан фақат дастлабки учта ташкилот ҳиссасига 6,9 трлн сўм тўғри келади. Бу рўйхатдаги жами имтиёзларнинг деярли ярми энг йирик учта корхона атрофида жамланганини англатади.

Рўйхатнинг кейинги поғоналарида “Ўзбекистон темир йўллари” АЖ — 1,1 трлн сўм, “UzAuto Motors” АЖ — 898,9 млрд сўм, “Asia Trans Gas” МЧЖ — 860,4 млрд сўм, “Luxury Diamond” МЧЖ — 811,8 млрд сўм, “My Freighter” МЧЖ (Cентрум Air) — 660,2 млрд сўм, “Solution Lab” АЖ  (Uzum Nasiya)— 650,8 млрд сўм билан қайд этилган.

Божхона имтиёзлари

Божхона имтиёзлари бўйича рўйхатда биринчи ўринни “Узгазтраде” АЖ эгаллаган. Компания 2025 йилда 2,1 трлн сўмлик божхона имтиёзидан фойдаланган.

Иккинчи ўринда RWS Optimum шўба корхонаси — 1,4 трлн сўм, учинчи ўринда эса “Enter Engineering Pte. Ltd”нинг доимий муассасаси — 1,1 трлн сўм билан кўрсатилган.

Топ-13 рўйхатдаги божхона имтиёзларининг умумий ҳажми қарийб 9,46 трлн сўмни ташкил қилади. Дастлабки учта субъектнинг ўзи 4,6 трлн сўмлик имтиёздан фойдаланган. Бу божхона имтиёзлари ҳам юқори даражада концентрациялашганини кўрсатади.

Рўйхатда, шунингдек, “First Fruits” МЧЖ — 955,2 млрд сўм, “Tebinbulak Mechanization Service” МЧЖ — 738,5 млрд сўм, “My Freighter” МЧЖ — 645 млрд сўм, Трест 12 АЖ — 519,5 млрд сўм, “Горилла Energy” МЧЖ — 414,5 млрд сўм билан қайд этилган.

Айрим компаниялар икки рўйхатда ҳам бор

Эътиборли жиҳати, айрим ташкилотлар ҳам солиқ, ҳам божхона имтиёзлари рўйхатида учрайди.

Масалан, Uzbekistan Airways солиқ имтиёзлари бўйича 2,4 трлн сўм, божхона имтиёзлари бўйича эса 288,4 млрд сўм билан қайд этилган. Яъни компания 2025 йилда икки йўналишда жами камида 2,68 трлн сўмлик имтиёздан фойдаланган.

“Uzgaztrade” АЖ ҳам ҳар икки рўйхатда мавжуд. Компания божхона имтиёзлари бўйича 2,1 трлн сўм, солиқ имтиёзлари бўйича эса 515,4 млрд сўмлик имтиёз олган. Умумий ҳисобда бу 2,6 трлн сўмдан ортиқ имтиёз дегани.

“My Freighter” МЧЖ (Centrum Air) ҳам икки рўйхатда кўрсатилган. Компания солиқ имтиёзлари бўйича 660,2 млрд сўм, божхона имтиёзлари бўйича эса 645 млрд сўмдан фойдаланган. Унинг умумий кўрсаткичи 1,3 трлн сўмдан ошади.