Трамп ҳокимиятга келганидан бери 1000 дан ортиқ ўзбекистонлик АҚШдан депортация қилинди
11 март куни АҚШ яна 72 нафар Ўзбекистон фуқаросини мамлакатдан депортация қилди. АҚШ элчихонасига кўра, Доналд Трамп президентликка келганидан буён ноқонуний иммиграцияга қарши сиёсат доирасида 1000 дан ортиқ ўзбекистонлик депортация қилинган.
11 март куни Америка Қўшма Штатлари 72 нафар Ўзбекистон фуқаросини депортация қилди. Бу ҳақда АҚШнинг Ўзбекистондаги элчихонаси маълум қилди.
Қайд этилишича, ушбу шахслар АҚШ ҳудудида қолиш учун қонуний рухсатга эга бўлмаган. Элчихона баёнотига кўра, мазкур парвоз Қўшма Штатларнинг чегаралар хавфсизлигини таъминлаш ҳамда ноқонуний иммиграцияга қарши кураш доирасида амалга оширилган навбатдаги чорадир.
Маълум қилинишича, Доналд Трамп президентлик лавозимига киришганидан буён АҚШ ҳукумати ноқонуний иммиграцияга қарши сиёсат доирасида 1000 дан ортиқ Ўзбекистон фуқаросини депортация қилган.
Шунингдек, расмий хабарда АҚШ ҳудудига ноқонуний кирган шахслар ҳибсга олиниши ва мамлакатдан чиқариб юборилиши мумкинлиги таъкидланган. АҚШ томони депортация жараёнларини ташкил этишда ҳамкорлик қилаётгани учун Ўзбекистон ҳукуматига ҳам миннатдорлик билдирган.
