Тошкент супермаркетларида баъзи озиқ-овқат маҳсулотлари нархи арзонлади

Вазирлар Маҳкамаси ҳузуридаги Макроиқтисодий ва ҳудудий тадқиқотлар институти (МҲТИ) томонидан 2025 йил февраль ойида Тошкент шаҳридаги йирик супермаркетларда 21 турдаги асосий озиқ-овқат маҳсулотлари нархлари мониторинги ўтказилди.

Олинган натижалар баъзи маҳсулотлар нархида пасайиш кузатилганини, айримларида эса нархнинг ошганлигини кўрсатди. Бир қатор маҳсулотларнинг нархи эса ўзгаришсиз қолган.

Мониторинг натижаларига кўра, 6 номдаги озиқ-овқат маҳсулоти минимал нархлари пасайган. Хусусан, картошканинг минимал нархи 26,1 фоизга, қизил сабзи 11,3 фоизга, лавлаги 8,2 фоизга, тухум 7,8 фоизга, сут 0,9 фоизга ва шакар нархи 0,4 фоизга арзонлашган. 

Пасайишнинг асосий сабаби бозор ҳолати ва импорт билан боғлиқ омиллар ҳисобланади. Жумладан, ўтган ойда картошка нархи сезиларли даражада ошгани сабабли Покистондан картошка импорт қилинди. Импорт ҳажмининг ошиши ички бозорда ўтган ой кескин кўтарилган картошка нархининг пасайишига олиб келди.

8 турдаги озиқ-овқат маҳсулотларининг минимал нархлари эса ўтган ойга нисбатан ошган. Бунда мавсумий омиллар муҳим роль ўйнади. Айниқса, оқбош карам нархи кескин ошди. Бу одатий мавсумий ҳолат бўлиб, баҳор мавсуми яқинлашгани сари баъзи сабзавотлар нархининг ўсиши кузатилади. Шунингдек, бодринг нархи ҳам ошган бўлса-да, у ўтган йилнинг айни давридаги нархларга нисбатан 30 фоизга арзонроқ бўлган.

Мониторинг жараёнида 7 турдаги маҳсулотлар нархи ўзгаришсиз қолган. Булар буғдой уни, гуруч, гречка, макарон, олма, банан ва товуқ гўшти (филе)дир.

Аввалроқ, январь ойида озиқ-овқат маҳсулотлари нархлари 2023 йил декабрдан бери энг юқори ойлик ўсиш кўрсаткичига етгани хабар қилинган эди.