Тошкент аэропортида хориждан олиб кирилаётган телефонларни расмийлаштириш вақтинча тўхтатилди
Божхона қўмитаси қарорни IMEI кодларини сохталаштиришга уринишлар кўпайгани билан изоҳлади.
Идора айрим телефонлар 30 кунгача экспертизага олиб қолинаётгани ва бир кунда расмийлаштириш учун қўшимча пул сўралаётгани ҳақидаги хабарларга аниқ жавоб бермади.
Божхона қўмитаси Тошкент халқаро аэропорти орқали хориждан олиб кирилаётган мобил қурилмаларни божхонада расмийлаштириш вақтинча тўхтатилганини маълум қилди. Идора IMEI кодларини текшириш ва қурилмалар қонуний олиб кирилганини тасдиқлаш тартибига бошқа идоралар билан бирга аниқлик киритмоқчи.
Қўмитага кўра, сўнгги вақтларда божсиз олиб кириш меъёридан фойдаланиш учун бошқа телефоннинг IMEI кодини кўрсатиш ёки битта қурилманинг маълумотлари билан бир нечта телефонни расмийлаштиришга уринишлар кўпайган. Идоранинг айтишича, IMEI-1 ва IMEI-2 кодлари битта қурилмага тегишлими ва улар орқали телефон аввал мобил тармоққа уланганми — буни аниқлаш учун мутахассис керак.
2026 йил бошидан бери “Тошкент-АЭРО” божхона комплекси 185 та ҳолатда жами 1 185 та мобил қурилманинг ноқонуний олиб кирилишининг олдини олган. Уларнинг умумий қиймати 8,8 млрд сўмни ташкил этган.
30 кунлик экспертиза ва қўшимча тўлов ҳақида нима дейилди?
Аввалроқ Pinkod хориждан олиб кирилган айрим iPhone’лар 30 кунгача экспертиза учун олиб қолинаётгани ҳақида ёзганди. Фойдаланувчилар телефонни бир кун ичида расмийлаштириш учун моделига қараб 400 доллардан 1 100 долларгача сўралаётганини айтган.
Қўмита баёнотида 30 кунлик муддат ва тезлаштирилган расмийлаштириш учун қўшимча тўлов ҳақидаги хабарларга аниқ жавоб берилмаган. Идора расмийлаштириш тартибига қисқа муддатда аниқлик киритилишини айтган. Йўловчилар расмийлаштириш бўйича саволлар ёки коррупция ҳолатлари юзасидан қўмитанинг кеча-кундуз ишлайдиган 11-08 рақамига мурожаат қилиши мумкин.
