Telegram’да катта янгиланиш тақдим этилди
Мессенжернинг сўнгги янгиланиши профилга мусиқа қўшиш, Android учун замонавий дизайн, ҳадяларга асосланган эксклюзив чат мавзулари ва бир қатор қўшимча имкониятларни ўз ичига олди.
Telegram’да навбатдаги янгиланиш тақдим этилди. Бу сафарги янгиланиш профилга мусиқа қўшиш, бирламчи профиль саҳифасини танлаш, коллексияланадиган ҳадъяларга мос ноёб чат мавзуларини белгилаш, дўстларга ҳадяларини юксалтиришда ёрдам бериш ва бошқаларни ўз ичига олади.
Профилдаги мусиқа
Энди исталган чатдаги аудио файлларни медиа плеерда бир марта босиш орқали профилга қўшишингиз мумкин. Трек профилга қўшилгач, у фойдаланувчи расми остидаги замонавий панелда кўринади.
Профилга треклар қўшилганда у автоматик равишда аввалги қўшиқларни ўз ичига олган плейлист яратади.
Профилингизга мусиқа қўшиш учун медиа плеердаги “Профилга қўшиш” тугмасини босинг ёки ушбу трекни танлаб, Сақлаш… > Профиль бандини босинг.
Android учун янги профиль дизайни
Яқинда ўтказилган танлов туфайли Android қурилмаларидаги профиллар энди iOS’да биринчи бўлиб жорий этилган замонавий янги дизайн ва варақлаш анимацияларига эга бўлди.
Telegram мунтазам равишда дастурчилар, дизайнерлар, контент яратувчилар ва бошқалар учун танловлар ўтказади — баъзиларига эса Telegram жамоасига қўшилиш имкониятини ҳам беради.
Бирламчи профиль саҳифаси
Энди профил очилганда биринчи бўлиб қайси саҳифа кўринишини танлаш мумкин — бу орқали сақланган ҳикоялар ёки ҳадя коллекциялар яхшироқ намойиш қилинади.
Профилингизда бирламчи саҳифани ўзгартириш учун Созламалар > Профилим рукнига киринг, саҳифани босиб туринг ва Асосий саҳифа сифатида белгилаш бандини танланг.
Ҳадя мавзулари
2021 йилдан бошлаб Telegram фойдаланувчилари алоҳида чатларга мавзуларни қўллаш имконияти яратилган. Эндиликда эса Telegram ҳадялари асосида яратилган ўнлаб янги динамик чат фон расмлари бу рўйхатга қўшилмоқда.
Бу фон расмларини очишнинг ягона йўли — ҳадяга эгалик қилиш. Ҳар бир фон расми ҳадя атрибутларига асосланган бўлиб, модель ва фон ёрдамида ҳар бир коллекция учун ноёб мавзу ҳосил қилади. Битта ҳадя битта чат учун битта мавзуни очади.
Бошқа фойдаланувчилар учун ҳадяларни юксалтириш
Энди сиз бошқа бировнинг профилида юлдузлари камроқ бўлса ёки ҳадяни юксалтириш мумкинлигини билмаган бўлса, ҳадъяни юксалтириш харажатини қоплаш учун юлдузлар юборишингиз мумкин. Агар фойдаланувчи кейинчалик ҳадясини юксалтиришга қарор қилса, бу у учун бепул бўлади.
Янги “Юксалтириш мумкин” фильтри ёрдамида юксалтириш мумкин бўлган ҳадяларни осон топиш мумкин. Шунингдек, “Кейинги ҳадяни юксалтириш” тугмаси билан бир нечта ҳадяни кетма-кет юксалтириш мумкин.
Ҳадя қиймати
Фойдаланувчилар Telegram ичидаги Ҳадялар маркетплейсида коллексияланадиган ҳадялар билан хавфсиз тарзда савдо қилиши мумкин.
Ҳадянинг атрибутларини кўришда янги “Қиймат” майдони унинг тахминий қайта сотиш нархини кўрсатади. Уни кенгайтириб, шу коллекциядаги бошқа ҳадяларнинг ўртача сотилиш нархи каби қўшимча статистикаларни кўриш мумкин.
Стикерлар мини иловаси
Telegram фойдаланувчилари ички муҳаррир ёрдамида махсус стикерлар яратиши ва @Stickers боти орқали тўпламларни бошқариши мумкин.
Бугундан бошлаб янги @Stickers мини иловаси ёрдамида стикер ва эможилар яратишингиз, тўпламларингизни бошқаришингиз ва батафсил фойдаланиш статистикасини кўришингиз мумкин.
