TBC Uzbekistan бош компаниядан алоҳида IPO ўтказишни кўриб чиқмоқда — Reuters
TBC Uzbekistan Грузиядаги бош компаниясидан алоҳида фонд бозорига чиқиш имкониятини кўриб чиқмоқда. Ҳозирча IPO қайси биржада ўтказилиши, қанча улуш сотилиши ёки қанча маблағ жалб қилиниши бўйича параметрлар очиқланмаган.
Бу ҳақда TBC’нинг Ўзбекистондаги бизнеси раҳбари Ника Курдиани Reuters’га берган интервьюсида маълум қилди. Агентликка кўра, TBC Uzbekistan’ни Грузиядаги асосий бизнесдан алоҳида листинг қилиш вариантлардан бири сифатида кўриб чиқилмоқда.
Бироқ ҳозирча гап IPO ўтказиш тўғрисидаги якуний қарор ҳақида эмас. Компания листинг майдончаси, муддати, баҳолаш, сотиладиган улуш ёки жалб қилинадиган маблағ ҳажмини эълон қилмаган.
TBC Bank Group’нинг ўзи Лондон фонд биржасида TBCG тикери остида савдо қилинади ва FTSE 250 индекси таркибига киради. Гуруҳ Ўзбекистон бозорига 2019 йилда Payme’нинг назорат пакетини сотиб олиш орқали кирган, 2020 йилда эса тўлиқ рақамли TBC Bank Uzbekistan’ни ишга туширган.
IPO’га айнан қайси бизнес чиқарилиши мумкин?
Бу ерда TBC Bank Uzbekistan ва TBC Uzbekistan тушунчаларини фарқлаш муҳим.
TBC Group Ўзбекистондаги активларини TBC Digital тузилмаси остида бирлаштирган. Гуруҳ ҳисоботларида TBC Uzbekistan фақат банкнинг ўзи эмас, балки TBC Digital ва унинг шўба компанияларини қамраб олувчи кенгроқ бизнес сифатида кўрсатилади.
Шу билан бирга, TBC’нинг Ўзбекистондаги экотизими энди фақат банк ва Payme билан чекланмайди. Гуруҳ бизнес учун SaaS ечимларини таклиф қилувчи BILLZ’ни ҳам ўз таркибига қўшган, 2026 йилда эса OLX Uzbekistan назорат пакетини сотиб олиш бўйича битимни якунлади.
Шу тариқа, TBC’нинг Ўзбекистондаги бизнеси банк хизматлари, тўловлар, бизнес технологиялари ва онлайн эълонлар бозорини ҳам қамраб олмоқда.
TBC Uzbekistan қандай кўламга етди?
2025 йил якунида TBC Uzbekistan’нинг умумий операцион даромади 64% ошиб, 3,17 трлн сўмга, соф фойдаси эса 581 млрд сўмга етган.
Кредит портфели бир йилда 41% ўсиб, 11,4 трлн сўмни, депозитлар эса 38% кўпайиб, 6,68 трлн сўмни ташкил этган.
Экосистема орқали амалга оширилган тўловлар ҳажми эса 61% ўсиб, 114,45 трлн сўмга етган. TBC маълумотига кўра, TBC Bank ва Payme биргаликда Ўзбекистондаги барча тўловларнинг қарийб 20%ини ташкил қилган.
2026 йил июнь охирига келиб Ўзбекистондаги рақамли ойлик фаол фойдаланувчилар сони 5,84 млн нафарга етган. Бу бир йил аввалгидан 3,3% кўп.
TBC Salom карталари сони 1,2 млндан ошган, иккинчи чоракдаги тўловлар қиймати эса доллар ҳисобида 54% ўсиб, $3,2 млрдни ташкил қилган.
