Шимолий кореялик ҳакерлар ядровий дастур учун 3 млрд доллар ўғирлаган — Microsoft
КХДРда ҳакерлар гуруҳи сонининг ошиб бориши Ким Чен Ин режими товламачилик билан боғлиқ ҳакерлик фаолиятидаги иштирокини кенгайтириб бораётганидан далолат беради.
Шимолий кореялик ҳакерлар 2017 йилдан бери 3 миллиард долларлик криптовалюталарни ўғирлаган. Бу ҳақда Microsoft компаниясининг киберхавфсизлик бўйича 2024 йилги ҳисоботида сўз боради. Ўғирланган маблағлар Пхенян ядровий дастурларини молиялаштиришга йўналтирилган.
Microsoft ҳисоботида қайд этилишича, ушбу маблағлар КХДРнинг ядровий қуролни яратиш борасидаги харажатларининг ярмидан кўпини қоплаган. Шу билан бирга, 2023 йилда 600 миллиондан 1 миллиард долларгача маблағ ўғирланган.
Компания ўтган йилнинг ўзида бир нечта янги КХДР гуруҳларини аниқлаган. Таҳлилчиларнинг ҳисоблашича, уларнинг сони ошиб бориши Ким Чен Ин режими товламачилик билан боғлиқ ҳакерлик фаолиятида иштирокини кенгайтириб бораётганидан далолат беради.
Шимолий Кореядан ташқари Россия, Хитой ва Эрон ҳакерлари ҳам фаол экани айтилмоқда.
Аввалроқ Шимолий Корея ҳакерлари Германиянинг Diehl Defence мудофаа компаниясига киберҳужумларни амалга оширганди. Улар вирусли электрон мактубларни йўллаб, ходимларнинг компютерларига киришга уринган.
Бирлашган Миллатлар Ташкилотининг май ойидаги махфий ҳисоботига кўра, тахминан 3,6 миллиард долларлик криптовалюта ўғирланиши ортида Шимолий Корея турган бўлиши мумкин.
