Ўзбекистонда исломий банк фаолиятини жорий қилишга қаратилган қонун расман қабул қилинди

Ўзбекистонда исломий банк фаолиятини жорий этишга қаратилган қонун расман қабул қилинди. Бу ҳақда Марказий банк матбуот хизмати маълум қилди. Қонуннинг расмий матни ҳозирча Lex.uz платформасига жойланмаган.

“Ўзбекистон Республикасининг айрим қонун ҳужжатларига Ўзбекистонда исломий банк фаолиятини жорий қилишга қаратилган қўшимча ва ўзгартиришлар киритиш тўғрисида”ги Ўзбекистон Республикаси Қонуни (ЎРҚ–1126) 2026 йил 27 март куни қабул қилинди.

Мазкур ҳужжат Марказий банк томонидан маҳаллий ва хорижий экспертлар билан ҳамкорликда ишлаб чиқилган бўлиб, унда халқаро стандартлар ҳамда илғор хорижий тажриба инобатга олинган.

Қонун билан Солиқ ва Фуқаролик кодексларига, шунингдек яна 7 та қонун ҳужжатига ўзгартириш ва қўшимчалар киритилди.

Хусусан, ҳужжатга мувофиқ қонунчиликка исломий банк фаолияти, исломий молия операциялари, исломий молия стандартлари ҳамда инвестициявий омонат (депозит) каби тушунчалар киритилмоқда.

Шунингдек, исломий банк фаолиятини амалга ошириш ҳуқуқини берувчи махсус лицензия жорий этилиб, уни олиш учун аниқ талаблар белгиланди.

Лицензияга эга банклар томонидан амалга оширилиши мумкин бўлган исломий молия операциялари рўйхати ҳам қонунда белгилаб қўйилган.

Бундан ташқари, исломий банк фаолиятини амалга оширувчи банкларга бевосита савдо фаолияти билан шуғулланиш, шунингдек юридик шахсларни ташкил этиш ва уларнинг устав фондларидаги улуш ёки акцияларни чекловларсиз сотиб олиш ҳуқуқи берилади.

Исломий молия фаолиятини мувофиқлаштириш мақсадида Марказий банк ҳамда банклар ҳузурида Исломий молия кенгашлари ташкил этилиши ва уларнинг фаолиятига қўйиладиган талаблар ҳам белгиланди.

Шунингдек, исломий молия операцияларига солиқ солишнинг ўзига хос тартиби ҳам алоҳида кўрсатиб ўтилган.

Қонун расмий эълон қилинган кундан бошлаб 3 ой ўтгач кучга киради.