Ўзбекистон олтин-валюта захиралари рекорд даражага етди — $61,2 млрд
Ўзбекистон халқаро захиралари бир ойда $1,9 млрдга ошиб, $61,2 млрдга етди. Захиралардаги олтин қиймати $3 млрддан кўпроққа кўтарилиб рекорд ўрнатди. Шу билан бирга, валюта захиралари $1,1 млрдга камайиб, $9,8 млрдга тушди.
Ўзбекистон халқаро олтин-валюта захиралари тарихий рекордларни янгилашда давом этмоқда. Марказий банк маълумотларига кўра, захиралар ҳажми ноябрь ойида илк бор 60 миллиард доллардан ошди.
1 декабрь ҳолатига кўра, регулятор захиралари $61,23 млрдни ташкил этиб, бир ой ичида $1,89 млрдга (3,2%) ва йил бошидан буён қарийб 48% га ошди. Бу — статистик кузатувлар олиб борила бошлаганидан буён қайд этилган энг юқори кўрсаткичдир.
| Кўрсаткичлар | 1 январь 2025 | 1 ноябрь 2025 | 1 декабрь 2025 |
| Расмий захира активлари (млрд $) | 41,2 | 59.3 | 61.23 |
| Олтин (млрд $) | 32,03 | 47,8 | 50,86 |
| Соф ҳажми (млн троя унция) | 12,3 | 11,9 | 12,2 |
| Хорижий валютадаги захира активлари (млрд $) | 8,6 | 10,9 | 9,81 |
| Шу жумладан имматли қоғозлар | $101,7 млн | $1,02 млрд | $1,52 млрд |
Захираларнинг асосий қисмини ташкил этувчи олтин қиймати ҳам рекорд даражага чиқди. Қимматбаҳо метал нархи бир ойда $3 млрддан кўпроққа ошиб, $50,86 млрдга етди. Олтиннинг физик ҳажми эса 0,3 млн унцияга кўпайиб, 11,9 млндан 12,2 млн троя унциясига етди.
Бунга қарама-қарши равишда валюта захираларида сезиларли камайиш кузатилди. Улар ноябрь ойида $1,1 млрдга қисқариб, $9,8 млрдгача тушди.
Шу билан бирга, Марказий банкнинг қимматли қоғозларга йўналтирган инвестициялари кескин ошди: бир ой ичида бу портфель $503 млнга кўпайиб, $1,52 млрдга етди. Таъкидлаш жоиз, регулятор қимматли қоғозларга сармоя киритишни бор-йўғи $100 млндан бошлаган эди.
